Bakarrik hizketan
EUROKOPA 2012
Espainiak irabazi egin dio Irlandari (4-0), C multzoko bigarren jardunaldian.
- Irlandak agur esan dio Eurokopari. Lehen taldea da aukerarik gabe geratzen. Gaur gainetik pasatu zaio Espainia.
- Txapelketa hasi aurreko 11 partidetan golik jaso gabe zegoen. Lehiaketako bi partidatan, zazpi sartu dizkiote. Ondoen egiten duena gaizki eginez gero, jai izatea da normalena.
- Espainiarena entrenamenduaren parekoa izan da. Aurkaririk gabe, edo aurkariak defentsa lasaia eginez lantzen diren ariketa horietako bat. Erasoko jokoa entrenatzeko partida egokia izan du. Bakarrik aritu da. Jokatuz, jolasean.
- Baloiaren jabe egin da, ohi bezala, eta erakutsi ere ez dio egin Irlandari. Bizi mugitu du tresna biribila, alde batetik bestera, jokalarien mugimendu egokiei esker, eta nola ez, teknika apartaren graziaz. Eta joan zen partidan baino hobeto zabaldu du zelaia.
- Espainia aldean egon den eztabaidan, aurrelari finkoarekin aritu edo ez, gaur Torresek jokatu du; aurrelari finkoa, berez. Baina mugitu, asko mugitu da. Hortaz, finko-finkoa ez da izan. Bi gol sartu ditu, gainera, (4. eta 70. minutuetan). Bere selekzioaren jardunareko oso garrantzitsua da hori.
- Gainerako golegileak Silva (49. minutuan) eta Cesc izan dira (83. minutuan). Anekdota. Datuen zerrenda gizentzeko.
- Xavi nahierara aritu da, eta hori gertatzen denean, gaurkoa bezalako emaitzak eta erakustaldiak gertatzen dira. Xabi Alonso eta Busquets ere gorago aritzeko moduan izan dira, ez aurreko partidan bezala. Horrek erraztu egin die espainiarrei presioa goian egitea. Eta bakarrik hizketan segitzeko aukera: baloiarekin hasi, jokaldiak osatu eta amaitu, edo hasi, osatu, galdu, berreskuratu, hasi, osatu eta amaitu.