Matematika errazetan ondo moldatzen ginenez, 40ri 3 gehituta, emaitza 43 dela ateratzeko gai gara. 43ri Reala jartzen badiogu aurretik, eta bien gainean, azpimarratuta idazten badugu ‘puntuak’, ekuazio berezi honen emaitza azkenekoa hauxe da: Realak bete du denboraldiko helburua.

Gaur, zortziak laurden gutxi pasatxoan, horrek behar luke Realeko zaleen hizketagaia. Behar luke, Racing garaitzeak ez duelako kontu zail-zaila ematen. Jakinagatik futbolean edozer gerta daitekeela. Baina edozer hori beti ez dela gertatzen ere kontuan eduki behar da. Bigarren aukera horren traza handia dauka Anoetako lehiak. Realak irabazi egin behar dio Racingi, eta ez dago aitzakiarik.

Azken sailkatua da Santander aldeko taldea. Aurkari txikia. Eta denboraldi honetan, Realak ondo menderatu ditu tamaina horretako kontrarioak Anoetan. Sporting, Zaragoza… zakukada gol hartuta itzuli ziren. Egia da lehen eginak ez duela balio, eta gaur lehen egindakoa berriz egin beharko dutela jokalariek. Baina aldez aurretik idatzi behar honetan, ematen du beste aurkari txikiekin egin zuena gaur berriz egiteko gaitasuna duela Realak.

Horretarako, hasieratik atera behar du hobea dela erakustera. Ezin du aurkariaren akzioaren aurrean erreakzioa ezarri. Berak behartu behar du kontrarioa erreakzioan murgiltzera. Racingi erakutsi behar dio gaur dela eguna, gaur beteko duela helburua, eta gosez jokatu beharra dago hori lortzeko. Aldez aurreko iragarpenak betetzen badira, Racing Bigarren Mailako taldea izango da gaur bertan.

Eta Realak helburua gauzatzen badu, orduan bai, orduan has daitezela datorren denboraldiko kontuak, zurrumurruak, Montanierren geroa eta gainerako kontu denak mahai gainean jartzen. Dagoeneko, gehiegitxo hitz egin bada ere horretaz guztiaz.