FC Krasnodar. Errusiako beste edozein talde duela hamabost egun arte. Data horretatik aurrera, Errusiako talde onena batzuentzat. Realak talde hori gainditu beharko du gaur eta hurrengo ostegunean, Europako Ligako multzoen fasean jokatu nahi badu.

Zozketan baziren talde eskasagoak, hori ezin da ukatu, baina Krasnodar hau zeruetako talde handienen pare jartzea gehiegizkoa ari da izaten. Ez da talde txarra, baliabide batzuk onak dauzka Realari min emateko, baina Realak berea egiten badu, ez dago Krasnodarrik Europako Ligan aritzea galaraziko dionik.

Realean, bada azken orduko berri onik: Vela eta Zurutuza jokatzeko moduan daude, eta 18ko jokalari zerrendan sartu ditu Jagoba Arrasatek.

Krasnodarren inguruan, analisi taktiko hau egin genion duela bi aste, Uralen aurka Errusiako ligan jokatu zuen partidan oinarrituz.

Anoetan izango da gaurko partida (20:30, ETB 1), eta bada ikusmina. Batetik, Realak zer maila ematen duen ikusteko, sisteman 4-4-2koa erabiliko duen edo ez ikusteko ere bai, eta bestetik, Krasnodarren benetako maila zein den argitzeko. Erantzunak Anoetan plazaratuko dituzte bi taldeek.

Erantzun horien baitan, bada bat oso beharrezkoa izango dena Realarentzat: atzeko lana, talde osoarena. Errusiarren indarra erasoan dago, batez ere kontraerasoetan, eta Realak galarazi egin beharko dio indar hori baliatzea. Ondo defendatu beharko du, eta hortik abiatuz landu erasoa, ikusirik Krasnodarren gabezia handienetako erasotik defentsarako trantsizioan dagoela.

Ondo defendatzeko era eta estrategia asko daude, eta ea Realak zein erabiltzen duen. Atzeak dantzatuko du aurrea gaur. Hori izango da gako nagusia.