Athleticek badu entrenatzailea, eta ez da ezusterik izan: Ernesto Valverde (Viandar de la Vera, Espainia, 1964) eseriko da zuri-gorrien aulkian datorren denboraldian. Hala baieztatu du klubak.

Bihar eguerdian izango da aurkezpena (12:30, Ibaigane Jauregia), eta hantxe emango dute kontratuaren iraupenaren berri.

Bigarren aldiz izango da Athleticeko entrenatzaile. Aurreko aldian 2003-2004 eta 2004-2005 denboraldietan izan zen. Aurrenekoan, bosgarren sailkatu zen taldea Ligan, eta UEFAko Kopa jokatu zuen. Lehiaketa horretan, ez da ahaztekoa Standard Liegen zelaian lortu zuen emaitza: 1-7. Hurrengo denboraldian, Ligan bederatzigarren bukatu zuen, eta Espainiako Kopako finalerdiak jokatu zituen.