Gauza jakina da Valverdek argazkigintza maite duela. Ez hori bakarrik: erakusketa bat baino gehiago egina du, eta liburu bat argitaratu zuen orain dela ez asko. Ez ditu bere bi pasioak sekula nahastu, ordea, eta bere argazkiek ez daukate futbolarekin zerikusirik. Pentsatzen jarrita, interesgarria litzateke aurtengo denboraldia nola erretratuko zukeen jakitea, “Athletic lau argazkitan” edo antzeko erakusketa batean. Kasurako, hona ideia batzuk:

Talde argazkia. Fokuz kanpo ageri dira jokalari zein bestelako lan taldea. Lauso, gandutsu dakusaguz aurpegiak. Begien parean izanda ere, kostata onartuko genuke hau Iturraspe eta hori Muniain direla. Eta hala ere, horra zortzia eta hemeretzia. Bi denboraldi atzera eginez gero argazki berarekin egingo genuke topo. Batean bale, hurrengoan kale, horrek dirudi Athleticen azken lau urteetako patua. Ilusiotik abiatzen diren denboraldietan sekulako maila eman ondoren, egindako lana berresterako orduan pott egin dute zurigorriek. Ezin ahaztu taldea urtetik urtera argalduz joan dela (Amorebieta,Llorente, Javi Martinez, Ander Herrera),ezta hiru lehiaketa tartekatzeak duen berezko zailtasuna, baina taldearen makalaldiak alimalekoak ari dira izaten, eta hartutako pozak bezainbestekoak izan dira zaplaztekoak. Zuri beltzean edo mila koloretan?

Napoli. Argazki honek badu zer edo zer onirikoa, ameskeria baten itxura, izan behar zuenaren eta izan ez denaren arteko talka. Napoli bide bazterrean utzi ondoren dena izan zen ezti eta apar Bilbon, are gehiago Athleticek lehen faseko aurkariak ezagutu zituenean. Bate, Porto, Shaktar? Hankapean erabili behar zituzten zorigarriek. Baina hara non, gauzak hasieratik okertu ziren, eta azkenerako hirugarren tokian Europa Ligarako sailkatu badira ere, zaila da Borisoveko gau hura ahaztea, ameskeria amesgaizto bihurtu zenekoa.

Cordoba, Elche, Granada. Argazkiak egiteko hiri zoragarriak hirurak. Bisitan etorri ziren San Mamesera, baina, eta utzi zuten argazkia ez zen goxoa izan. Sailkapenaren hondoan lurperatuta iritsi, eta hala ere, irabazi. Talde horien berpizteak Athleticen pattalaldia azkartu zuen, argi utziz ligako bidea malkartsua izango zela, ez zuela iazkoarekin zerikusirik izango.

Espanyol. Ilusioaren argazkia Kopari lotutakoa izango da beste behin. Txapelketa honek Billbon sortzen duen kitzika ezaguna da, eta are gehiago aurten, taldea pozez eskas dabilen denboraldi batean. Txapeldunen Ligako zozketarekin gertatu bezala, hala ere, askok lortutzat ematen dute finalerako txartela, kanporaketa jokatu gabe dagoen arren. Eta Espanyolek, besteak beste, Sevilla kanporatu duela ahaztuta. Aurkari gogorra izango dute zuri gorriek aurrez aurre, eta ez hori bakarrik: baita orain arte fokuz kanpo ageri den argazkia zuzentzeko aukera ere.