Goazen sei urte atzera. Gabonen buelta da. Reala estu eta larri dabil Lehen Mailan. Atzeko zuloan. Pare bat hilabete da Lotina ekarri zuela entrenatzaile, Bakeroren ordez. Neguko merkatua zabalik da, eta taldeak aurrelari bat fitxatu nahi du.

Izenen musikarekin dantzan dabiltza zaleak. Fede Higuain, Pavone… eta Cardozo. Oscar izenez. Paraguaikoa. 22 urte. Ia bi metro luze. Newell’s Old Boysen ari da, baina eskaintzak omen dauzka nazioartetik. Tartean, Realarena. Argentinako klubak bere jokalari garrantzitsuenetakoa ez du galdu nahi, eta dirua eskatu du trukean. Itxuraz, tratutan ere ibili dira hiru aldeak. Une batean, badatorrela ematen du. Gero, ezetz. Hurrengoan, agian…

Azkenean, Lisboan bukatu zuen, 2007ko udan. Benficak fitxatu zuen. 8 bat milioi euro ordaindu zituen. Sei hilabete lehenago merkeago saltzekotan egon zen, baina eroslea ez zen ausartu dirua jartzera. Reala ei zen erosle hura.

Cardozo ez, eta German Herrera iritsi zen Realera. Beste aurrelari bat. Beste jokalari mota bat. Denboraldi hartan jo zuen hondoa Realak. 2007an, Bigarren Mailara. Oraindik ere, zale asko oroitzen dira Cardozorekin: “Ekarri izan balute…”, esaten dute.

Benfican, lau denboraldi eta erdian, 202 partida jokatu ditu, eta 125 gol sartu. Arriskatu egin ziren arrano gorriak, eta tacuarak golekin eskertu die.

Gaur, Chelsekoek gertutik zaindu beharko dute, Txapeldunen Ligako final-laurdenetako joanekoan, Lisboan (20:45).