Arkitektoa
EUROKOPA 2012
Italiak eta Kroaziak berdindu egin dute (1-1), C multzoko bigarren jardunaldian.
- Puntu ale bana bakoitzarentzat. Kroaziak lau puntu, Italiak bi. Azken jardunaldiaren zain egon beharko dute biek, sailkatu edo etxera joango diren argitzeko.
- Italiarentzat izan da lehen zatia. Kroazia hobeto moldatu da bigarrenean; batez ere, berdinketaren goletik aurrera.
- Italia ondo. Taldea, egitura, eta lana betiko ezaugarriei eusten die, eta orain, baloia jokatzea gehitu dio. Horretarako arkitekto onenetakoa izanda, aukera logikoa: Andrea Pirlo. Erakustaldia eman du lehen zatian, eta baita bigarrenean ere, atzerago aritu behar izan badu ere bigarren erdian. Gattusok hau esan zuen behin Pirlo nabarmentzeko: “Jokatzen ikusi nuenean, neure buruari galdetu nion ea futbolaria nintzen”.
- Pase asko ematen ditu, eta ondo emateaz gain, zehatz, logikaren bidean joaten dira. Gainera, ia beti bakarrik egoteko abilezia dauka, non eta jokalari gehien pilatzen diren esparruan, zelai-erdian. Kroaziak bi aurrelari izatean, erraztu egin dio lana arkitektoari, zelai-erdian bi baino ez zituelako (Modric eta Vukojevic); Italiak hiru: Pirlo maisua, Marchisio eta Motta.
- Paseak ematen ez ezik, falta nola jaurti behar den erakutsi dio mundu guztiari. Gol ederra eta bikaina (41. minutuan).
- Talde ona da Italia, baina zuloak ere baditu. Aurrealdean, lan ona egiten ari dira Cassano eta Balotelli, baina gola sartzea gehitxo ez ote zaien ari kostatzen… Bi aurrelarirekin jarduteko, eraginkortasun gutxitxo dauka. Hegaletara asko joaten dira, atzeko jendeari lekua uzteko erditik, eta horrek urrundu egiten ditu areatik. Horrela dauka antolatuta taldea Prandellik. Eta ez da kritika txarra. Jantzi dotorea eman dio eta taldeari.
- Kroazia ezinean ibili da lehen zatian. Beldurtu bezala egin du aurkariaren nagusitasunak. Eskerrak bere mesedetan italiarrek ez duten gauzatu nagusitasun hori. Emaitza zabalik zegoen, gol gehiagori sartzen uzteko atea libre.
- Bigarren zatiaren hasiera luzean ere eroso moldatu da Italia. Baina ez zen lehen erdiko nagusitasun bera. Horrela zirela, Kroaziak gola sartu du. Ondo mugitu dute baloia hegal batetik bestera, eta oso partida ona egin duen Strinic ezker hegaleko atzelariak erdiratu eta gero, Mandzukicek hirugarren gola sartu du Eurokopa honetan. Chielliniren hutsa baliatuz, jan egin baitu baloia italiarrak. Hala ere, teknikoki bikain aritu da aurrelaria: kontrola ederra, eta jaurtiketa, bikaina.
- Hazi egin da Kroazia golaren eraginez. Beren buruari esanez bezala “hauek hainbeste gara”. Onura horretan, golaren aurretik eta gero ere bai, eragina izan du Rakitic euskarri aldera joateak, eta Srnak eskuin hegal osoa libre izatea horrela. Modricek ere aurrerago jokatu du, aurrelarien atzean, eta hor egiten du minik gehien erdilari abilak.
- Italiak ez du asmatu berdinketaren zama gainetik kentzen. Saiatu, saiatu da, baina ez du eduki gaitasun hori.