Futbolean, bizitzan bezala, zorigaitza badagoela pentsatzen duenik egongo da. Atzekoz aurrera jaio dela sinisten duenik. Bere patua txapelketarik ezin irabaztea dela uste duenik. Hamaika aldiz saiatuta ere, bere helburua ez duela lortuko barneratuta daukanik. Futbolaren historiako zorigaiztokoen klubak kide asko ditu: futbol taldeak, entrenatzaileak nahiz jokalariak. Futbolaren historian pixka bat arakatuz gero, patu tristeak erakarritako hamaika istorio aurki daitezke.

Zorigaiztoaren sentipena pertsona bakoitzaren baitan dago. Patu gaiztoa onartzea edo iraultzen saiatzea. Horiek dira aukerak. Arjen Robbenek bigarrenaren alde egin du. Bere kirol ibilbidean pilatutako gaziak barneratu, onartu eta entzungor eginez, gainditzen saiatu da. Atzean utzi behar izan ditu lehiaketak eman dizkion kolpe mingotsak: 2010eko Txapeldunen Liga Interren aurka galdu izana nahiz urte bereko Munduko Txapelketako finala Espainiaren aurka. 2 hilabete eskasean edozein amiltzeko moduko 2 kolpe gogor. Baita joan zen urtean etxean, Munichen, zaletuen aurrean Txapeldunen Liga behingoz irabazteko aukera ere. Aurretik kurrikulumean pilatu ditu herrialde desberdinetako koparen bat eta baita ligak ere, baina Txapelketa Handirik lortu ezin zuenaren usteak arrazoiak pilatzen zituen.

Baina Robben ez da kikiltzen den horietakoa. Galdutako final horietan protagonista izan da, eta finalak erabakitzeko aukera garbiak izan ditu gainera. Beste edonork amore emango zuen, bere patua onartuko zuen, etsituta. Arrakasta eta porrota, txanponaren bi aldeak dira, baina berak hainbatetan txanponaren aldea erabakitzeko aukera izan eta kale egin du.

Jokalari erasokorra da, oldarkorra, behin eta berriz aurrera baloia oinetan duela egiten duenetakoa. Jokaldi batean bere helburua lortzen ez badu ez da kikilduko, eta berriz eskatuko du baloia. Ardurak ez dio beldurrik ematen jokoan; alderantziz, gustuko du, protagonista izan nahi du, buruz buruzko lehian atzelaria bilatzen etengabe, behin eta berriz.

Azkenean, jaso du saria. Maiatzaren 17an Londresen Txapeldunen Liga irabazi zuen Municheko Bayernrekin. Aurreko 2 finalak galdu zituen talde berarekin. Bere modura irabazi zuen gainera. Lehenengo golean parte hartuz eta bigarren gola eginez. Ekimena hartuz. Protagonista izanez. Garaipenaren gola ospatuz bota zituen garrasiekin urte hauetan patuak eman dizkion gaziak eta minak, zorigaitza zorion bihurtuz.