Boateng izeneko futbolariak badira batzuk. Horrela, boteprontoan, hiru etorri zaizkigu gogora: Boateng anaiak, eta Getafen aritu zen beste Boateng hura.

Anaietako batek jokatzen duenean, galdera etortzen zaigu ezpainetara: “Hau zein da, Alemaniako selekziokoa ala Ghanakoa?”. Ez baitute selekzio berean jokatzen. Anaiak izan arren. Bueno, anaiak ere ez dira, zehatz azaltzeko; anaiordeak, baizik. Aita bera daukate, ama ez.

Alemaniako selekziokoa Jerome Boateng da (Berlin, Alemania, 1988). Ghanakoa Kevin-Prince Boateng (Berlin, Alemania, 1987). Biak alemaniarrak, jaiotzez. Eta hezi ere herrialde horretan heziak. Orduan, nola ez du jokatzen Alemaniarekin anaiorde zaharrenak?

Jokatu, jokatu zuen, 21 urtez azpiko taldean. Baina gau batean, taldekideak hartu, eta parrandara joan ziren. Entrenatzaileak harrapatu egin zituen, eta ez oso itxura onean. Kevin-Prince jo zuten debekatutako irteera haren antolatzailetzat, eta bidali egin zuten Alemaniako selekziotik. Horren aurrean, erabaki hau hartu zuen: Ghanarekin jokatzea. FIFAri eskatu zion baimena, eta baiezkoa jaso zuen. 2010eko Munduko Kopan Afrikako herrialde horretako selekzioarekin aritu zen.

Bien bitartean, Jeromek bere bideari segitu zion, eta bera ere 2010eko Munduko Kopan izan zen. Baina Alemaniarekin. Elkarren aurka ere aritu ziren bi anaiordeak, D multzoko hirugarren eta azken jardunaldian. Alemaniak irabazi zion Ghanari (1-0). Jeromek Kevin-Princeri.

Baina ez ziren elkar agurtu. Haserretuta daude bi anaiordeak. Bere garaian, Kevin-Princek leporatu zion Jeromeri ez ziola batere lagundu: “Zuk zure familia daukazu, eta nik nirea”, esan omen zion anaiorde zaharrak gazteari, haserre. Horrek min eman zion gazteari, eta harremana eten zuen.

Alemaniako zaleen aurrean, kuttuna Jerome da. Kevin-Prince ez dute ikusi ere egin nahi. Selekzioz aldatzea gutxi ez, eta 2010eko Munduko Koparen atarian, beste gertakari batek are gehiago ilundu zuen zaleen iritzia. Txapelketa hasi baino hilabete eskas lehenago, FA Cupeko finalean, Boateng zaharrak hanka txikitu zion Michael Ballacki. Portsmouthen ari zen orduan Ghanako alemaniarra. Munduko Koparik gabe utzi zuen Ballack.

Sutu egin zituen horrek zale alemaniarrak. Lehengo txinparta bizitu zuen. Jeromek, lehen bezala, bere bideari jarraitu zion, eta Alemaniako zaleek gogoko dute. Anaiordea kontrako muturrean edukitzea ere lagungarri izango zitzaion zaleen gustukoa izateko.

Eta, jakina, Alemanian jokatzen aritzeak ere gertutasuna handitu egin du. Bayern Munichen ari baita erdiko atzelaria. Anaiorde zaharra, aldiz, Milanen. Alemaniako zaleen aurrean, bistan da bietako nor den anaiorde ‘zintzoa’.

Gaur, Txapeldunen Ligako finalerdian ariko da, Real Madrilen zelaian (20:45). Joaneko 2-1koari eusten. Gaizto planean jarri beharko du espainiarren oldarraldiari bidea mozteko.

http://www.youtube.com/watch?v=CSBa5M9g29Y