Ez zen egun ona izan atzokoa Amorebieta eta Athletic Brentzat. Biak galtzaile. Biek zuten atzeratutako partida Bigarren B Mailako 2. multzoan. Amorebietak Salamancan galdu zuen (1-0), eta Athletic Bk Burgosen (1-0).

Lehen minutuan jaso zuen gola Asier Intxaurragaren taldeak, eta ondo jokatu bazuen ere, ez zen gai izan aukerak gauzatzeko. Pentsa, argiena ere alferrik galdu zuen: penaltia huts egin zuen Candelasek (45. minutuan). Partidaren kontaketa klubeko twitterrean egin zuten. Ikusi nahi baduzue, hemen daukazue.

Galdu arren, igoera jokatzeko lau postuen barruan segitzen du: laugarren da, eta lau puntu ateratzen dizkio Guijuelo bosgarrenari.

Athletic Bk azken sailkatuaren zelaian galdu zuen. Golean huts egin zuen Cuco Zigandaren taldeak; Serrantes atezaina eta Bustinza ez ziren elkar ulertu, eta Arkaitzek ondo baliatu zuen oparia.

Sailkapenean, ez gora eta ez behera geratu dira zuri-gorriak. 10. daude, 36 punturekin.

Lemoak berdindu egin du Federazio Kopako finalerdietan, joanekoan

Bizkaiko beste talde batek ere partida zuen atzo. Lemoak Federazio Kopako finalerdia zeukan Ceutan, joanekoa, eta berdindu egin zuen (1-1).

Orbegozok sartu zuen bizkaitarren gola (80. minutuan), baina etxekoek luzapenean berdindu zuten. Epaileak Lemoari gol bat baliorik gabe utzi zion.

Itzulikoa martxoaren 15ean jokatuko dute.

Beste finalerdian Teruelek irabazi egin zion Binnisalemi (2-1).