Jakina da Realak partida oso zaila duela gaur Bartzelonaren aurka (22:00), bere zelaian. Aurkari ia denak txikitu egin ditu Pep Guardiolaren taldeak etxean, eta gaur Reala joango zaio bisitan. Zale askoren artean galdera hau dabil: zertarako gai izango dira txuri-urdinak?

Atzo, Philippe Montanierrek ondo azaldu zuen zer egin beharko duten jokalariek, emaitza ona lortzekotan: “Inoiz baino korrika gehiago egin beharko dute, inoiz baino gehiago lagundu beharko diote elkar, eta kalitatea eduki beharko da”. Beste hitz batzuetan esanda: ondo defendatu egundoko lana eginez, eta erasoan ondo aritu. Ez dago hobeto azaltzerik, eta egokiak dira Normandiako entrenatzailearen hitzak.

Jokalari zerrendan badira berrikuntzak: Javi Ros eta Ruben Pardo joan dira Bartzelonara, Elustondo eta Zurutuza lesionatuen ordez. 19 jokalarik osatzen dute zerrenda.

Bartzelonakoen zerrenda ez du oraindik jakinarazi Guardiolak. Atzo, honela definitu zuen Reala entrenatzaileak: “Baloia ondo ateratzen dute atzetik, eta ondo iristen da gora hegaletatik eta barrualdetik. Azken bederatzi partidetan, bakarra galdu du”.