Bukaerako zatia ikusita, emaitza ona
TXAPELDUNEN LIGA
NAPOLI 1 / ATHLETIC 1
Athletic aurretik ibili den arren partida eroso kontrolatuz, azken hogei minutuetan asko sufritu behar izan du.
- Zer den futbola. Nola aldatzen diren gauzak, ze traza ezberdin har dezakeen jokoak une batetik bestera. Horixe gertatu da San Paolo estadioan gaur. Athletic eroso ibili da ia 70 minututan, eta hoztu egin du Napoliren berotasuna. Baina kolpetik, erabat aldatu da partida (norbaitek aldatu du), eta bukaerako 1-1eko emaitza ontzat jotzeko moduan da Athletic, tarte txarrak igaro baititu azken une horretan.
- Txapeldunen Liga gertuago dagoela esango da bazterretan, itzulikoa San Mamesen jokatzen delako. Izan daiteke bai, baina Napolik zer egiten duen ere ikusi egin beharko da. Gaur bi gauza ezberdin egin ditu: lehen zatian eta bigarrenaren zati batean, oso talde arrunta eman izan du; eta azkeneko hogei minutuetan, edozein aurkari dantzan ibiltzeko gai dela eman du aditzera.
- Eta Athletici buruz zer? Partida txukuna egin du, ez baita erraza San Paolo zelaian kontrolpean edukitzea neurketa. Napoliren estrategiak ere eragina izan du horretan, lerroak asko atzeratu dituelako Benitezen taldeak, kontraerasoan ateratzeko. Athleticek baloia eduki ahal izan du, eta eroso antzean ibiltzen denez era horretara, hortik etorri zaio kontrolarena.
- Hasieran, lehen minutuak ero samarra izan dira. Nahi izan dio Napolik gatza eta piperra jarri partidari, eta zarata atera du behintzat. Etekinik ez, ordea. Hortik aurrera hasi da eroso egoten Athletic. Eta aldeko golak are erosoago ipini du. Muniainek egin du gola, De Marcosen erdiraketa eta Mikel Ricoren mugimendua baliatuz. 41.minutua zen, eta jokoaren ondorioa izan dela esan daiteke, Napoli ez baitzen ari ezer egiten. Athletic ere ez gauza asko aurkaria estutzeko, baina gola alde izan du.
- San Paoloko zaleak estutzen hasi dira… beren taldea, bigarren zatiaren hasieran. Napoli ez zen gauza jokaldi bat lantzeko, eta haserretu egin dira zaleak. Zerbait egin beharra zeukan Benitezek, eta Mertens atera eta partida erabat aldatzea bat izan da. Presioa goian egiten hasi da Napoli; Athletici deseroso jarri du, eta infernuaren traza izan dute azken hogei minutuek euskal herritarrentzat. Eskerrak aukera bakarra gauzatu duen Italiako taldeak. Higuainek egin du gola, 68. minutuan. Izan du gero ere aukera garbi bat, baita bere taldekide batzuek ere, baina denak urrundu ditu Iraizozek. Azaldu behar izan duenean azaldu da atezaina.
- Izen propioak ematen hasita, Muniain ezin aipatu gabe utzi. Maggio beteranoa bere onetik aterata ibili du, eta min handia eragin dio Napoliri. Bere lanari etekina ateratzea falta izan zaie taldekideei, erdiraketa zitalak eta errematatuz.
- Azkenean, gaurko ondorioa erraza da ateratzen: aurkaria kontrolpean eduki dutenean bi taldeek, ez diote etekin handirik atera, eta San Mamesek botako du azken epaia. Sari potoloa dago jokoan, eta gaurkoa islatzen bada datorren astean, bietako edozeinek gozatuko du Txapeldunen Ligan.