Heldu da eguna. Hemen da Txapeldunen Ligan sartzeko atea ireki behar duen giltza. Athleticek joan zen denboraldia amaitu zenetik izan du begiz jota egun hau. Napoli gainditu beharko du Europako kluben arteko lehiaketa handienean parte hartzeko. Ez da erraza izango… ez batentzat, ez bestearentzat.

Joaneko partida dute gaur, San Paolo estadio handian (20:45). Ez du ematen kanporaketa gaur erabakiko dutenik, baina batek jakin…

Zozketak ez zion zorte onik ekarri Athletici. Napoli zen toka ziezaiokeen aurkari gaiztoena, eta bera jarri behar parean.

1926an sortu zen Napoli, baina 2004an desagertu egin behar zuen, diru zorrak tarteko. 2004-2005 denboraldian ekin zion bideari berriz, Hirugarren mailan, eta 2007an lortu zuen Serie Ara igotzea.

Rafa Benitez espainiarra du entrenatzaile aurreko denboralditik, eta azken boladan emaitza onak lortzen ari da taldea. Mazzarri entrenatzaile zela ere (Benitezen aurrekoa) ondo ibili zen Napoli, eta baita aurreko denboraldian ere.

Jakina da Benitezen zaletasunetako bat zein den: jokalariak fitxatzea. Liverpoolen egin zuen bere garaian, eta Napolin ere gauza bera egin du. Eraberritu zuen egin du taldea, eta horretan jarraitzen du oraindik. Oso jokalari ezagunak dauzka Italiako hegoaldeko taldeak; esaterako, hauek: Gonzalo Higuain aurrelaria, Henrique atzelari-erdilaria, Maggio atzelaria, Mertens aurrelaria, Hamsik erdilaria, Zuñiga atzelaria, Pandev aurrelaria, Dzemaili erdilaria, Insigne aurrelaria, Raul Albiol atzelaria, Inler erdilaria… Bistan da talde oso ona dela.

Izarrak dauzka, baina izarren gainetik talde izaera jartzen du Benitezek. Oreka eman zalea da taldeei, eta nekez hausten dira berak zuzendutako taldeak. Hori bai, bere taldeak gai dira aurkaria hausteko, eta gaur Athleticek oso kontuan eduki beharko du hori: ez dezala Napolik bere gustuko erritmo bizia ezarri.

Athletici dagokionez, ezaguna da zein duen jokatzeko moldea Ernesto Valverdek. 11koa ere zehaztua dauka, eta aurreko sasoiko bera izango da, aldaketa bakarra eginda: Ander Herreraren lekua Beñatek beteko du. Bestelakoan, ohikoa izango a jokalari multzoa, Iraolaren lekuan De Marcos aritzea ez baita kontu zaharra.

Bi talde handiren arteko lehendabiziko borroka izango da gaurkoa. Arriskuz beterikoa bientzat… baina baita aukerez ere. Partida handia izateko traza dauka gaurkoak. Txapeldunen Ligan aritzeko pagotxa dago jokoan.