Denborak erantzun beharreko galderak
EUROPAKO LIGA
- Realak azken-aurreko kanporaketa gainditu du, Aberdeeni gaur ere irabaziz (2-3). Beste kanporaketa bat gainditzen badu, multzoen faserako sailkatuko da.
- Emaitza aldekoa izan bada ere, taldearen jokoak zalantzak utzi ditu.
- Ur handitan sartu baino lehen, emaitzari aipamena. Azken batean, kanporaketa izan da Aberdeenen eta Realaren arteko hau, eta Realak egin du aurrera. Gaur ere menperatu egin du Eskoziako talde historikoa (2-3). Baina ez Anoetan bezain nabarmen; jokoan, ez du duela astebeteko nagusitasunik erakutsi Realak. Dena dela, azkeneko kanporaketan izango da, eta hori gainditzen badu, Europako Ligako multzoen ariko da.
- Gaur nagusitasunik gabe aritze horrek sortu ditu galderak eta zalantzak. Jokoaren hainbat arlotan, baldar ibili da taldea. Gaurkoa gaur bertan bukatu da, eta ez du esan nahi bide beretik ariko denik taldea. Ikusi egin beharko da nolakoa izango den sasoi honetako Reala. Gaur, gaurkoak aztertzea tokatzen da… baina galderak eginez.
- Ez du partida kontrolpean eduki. Ia inoiz ere ez. Akaso, 0-1ekoa Xabi Prietok sartu eta hurrengo minutuetan. Baina ez da izan oso kontrol eraginkorra. Baloiaren jabetza luze edukitzeko aukera ona ez du baliatu taldeak. Gai al da horretarako? Ba al da hori egiteko jokalaririk? Edo oso talde bertikala da bakarrik? Aberdeenen defentsako lan txarrak aukerak erraz sortzeko pagotxa eman dio Realari, eta akaso, horrek eragina izan du jokoaren bertikaltasunean. Hain erraz ikusita zuloak, ez da erraza kontrola izaten.
- Defentsako lanean ere zalantzak… edo errealitate gordina. Presio altua egin ezean, deseroso egon da taldea. Zelaiaren erdi-erdian zulo asko utzi ditu. 4-4-2ko marrazkia aukeratu du gaur ere Jagoba Arrasatek, eta erdiko laukoa erronbo itxurakoa. Defentsan, ematen du ondo antolatzea falta zaiela oraindik… edo, ez dira jokalari egokiak Xabi Prieto, Pardo, Zurutuza eta abar lerroak atzeratuta defendatzeko?
- Zalantza horiek ugaritzen joan diren neurrian, Aberdeen esnatzen hasi da, eta 1-1ekoa egin du Pawlettek atsedenaldira joan baino minutu batzuk lehenago. Anekdota ematen zuen golak, nahiz eta Realak partida kontrolpean ez eduki. Baina anekdota azkar bilakatu da beldur eta kezka, eskoziarrek 2-1koa sartu dutenean. Reynoldsek sartu du 57. minutuan. Mamu beltzak azalduko ote ziren beldurra zabaldu da Realekoen artean.
- Aberdeenek, baina, ez du asko estutu Reala. Ez du jokorik horretarako. Realak ere ez du asko erakutsi une horietan. Zer gertatuko zen Aberdeen baino talde hobea izan balu gaur parean Realak? Ligan, esaterako, gaur bezala jokatuta, ez al luke bide motza eta okerra Realak?
- Talde bat hobea denean eta hobea ez denak aukera baliatzen ez duenean, hobeak gauzak bere lekuan jartzen ditu. Askotan gertatzen da hori. Aberdeenen ere bai gaur. Azken minutuetan, Realak irauli egin du emaitza. Xabi Prietok penaltiz (86. minutuan) eta Markel Bergarak buruz (91. minutuan) sartu dituzte golak.
- Hurrengo kanporaketa dator orain. Zozketa lehendabizi. Baina Realak badu zer hobetua eta zer erantzuna. Hemen jarri ditugun galderei ete beste batzuei. Denborak esango du nolakoak diren erantzunak. Ez baita ahaztu behar abuztuaren 7a dela oraindik, nahiz eta lehiaketa ofiziala izan.