Europako futbolean, kluben artean joka daitekeen partida erakargarriena gaur gauean ikusteko aukera izango da: Bayern eta Bartzelona parez pare, Munichen, Txapeldunen Ligako finalerdien joanekoan (20:45).

Europako taldeen artean, jokoz erakargarrienetakoak diren bi talde dira alemaniarra eta kataluniarra. Bien egungo joera aztertzen hasita, Bayern jo behar da faboritotzat. Egundoko emaitzak ari dira lortzen sasoi osoan, eta Bundesliga irabazi berri du, erabateko nagusitasunez. Bartzelona, aldiz, ez dabil fin-fin, lehen baino gehiago kostatzen zaio orain irabaztea.

Baina edozeinek joka dezakeela finala idaztea ez da topikoetan sartzea. Biek daukate gaitasuna soberan aurkaria menderatzeko.

Baloiarekin ikusgarriak dira bi taldeak, erosoen baloiaren jabe direla sentitzen dira. Eta baloirik gabeko lana? Hori izan daiteke gaurko gakoetako bat. Ematen du gaur-gaurkoz Bayernek aukera gehiago duela Bartzelonaren jokoa geratzeko alderantziz baino (hutsune handiak dituzte kataluniarrek erdiko atzelarien artean). Baina ikusi egin beharko da gero…

Erasoan aritzen diren bi talde izanik, gol ugari izan daitezke. Baina gerta daiteke hau ere: finalerdia izanik, zuhurtzia handiagoz aritzea besteetan baino.

Jarrai nezake zer izan daitekeenaren jiran idazten, baina aurreikuspen guztietan ondorio bera topatzen dut parean: edozer gerta daitekeen hori. Eta ez da topikoa.