Gustuko tokian ere aldapa
SEVILLA 2
ATHLETIC 1
Bere gustuko erritmoan jokatu arren, Athleticek ez du asmatu emaitza ona lortzen.
- Sevilla ez du gustuko plaza Athleticek, eta gustuko tokiarena ez dator horregatik. Partidaren ezaugarriak biltzeko da gustukoarena. Izan ere, aspaldiko partez, Athleticek berari gehien komeni zaion erritmoa ipini dio partidari. Alde horretatik, eroso ibiltzeko aukera izan du, gora eta behera, behera eta gora etenik gabeko hori oso nekagarria izan arren. Emaitzak, baina, ez dio lagundu, Athleticek berak ezertan ez duelako asmatu emaitzetan islatzen den horretan: bi areatako lanean, eta batez ere, aurkariarenean.
- Aurreikusten zena azaldu du norgehiagokak: oilarren dema, jokatzeko eredu ‘zoroa’ (nolabait esateko) oinarri hartuta. Kontrolak beste talde batzuen ereduetan azaltzen dira. Bilbon eta Sevillan deskontrola nagusi. Joera hori indartzeko, gainera, Sevillak azkar egin du gola (4. minutuan, Negredok); geldikako jokaldian larri beste behin Athletic… Llorente zelaian izan arren. Eroa zetorrena txoratu egin du golak.
- Athletic bere betiko ereduarekin, baloia laguntzat hartu nahian. Sevilla kontraerasoan, joko zuzenaren hainbat dosi ere sartuz. Erritmoa bizi, azkartasuna, abiadura… halakoetan ez da erraza izaten gauzak taxuz egitea, eta horixe izan du beste ezaugarrietako bat partidak: erasoan, bi taldeei falta izan zaie bukaerako zehaztasuna. Nabarmena eta mingarria izan da Athleticen kasuan egoera hau, bi aldiz edo gertatu delako: berekoikeria barkaezina jokalari batzuen artean, golak itsututa.
- Minutuak aurrera joan ahala, Athletic baloiaren lagun egin da, eta asmatu du Sevillaren presioa hausten. Beraien atzelarien eta euskarrien artean bakarrik ibili dira jokalari zuri-gorriak, eta egoera onean hartu dute baloia hainbat bider. Hortik aurrera izan da zehazgabetasuna.
- Bigarren zatian abiadura beretik joan da neurketa, baina are eta zehaztasun gutxiagorekin. Azken metroetako abiadura eta huts gehiegizkoek kutsatu egin dituzte, nonbait, zelaiko beste leku batzuetako lanak. Iturraspe eta Aduriz zelairatu ditu Bielsak bigarren zatirako, Llorente eta San Jose aldagelan utziz.
- Berdindu egin du partida Athleticek. Gurpegik buruarekin doi-doi ukitu du baloia, Ibaiek ateratako falta batean. Nahikoa sarera botatzeko. Berdinketak beste partida bat ekarriko zuen ustean zeudenak, oker erabat. Aurkariaren atea begiz jota segitu du Athleticek, ohi duen moduan, eta ematen zuen Sevilla hamar jokalarirekin geratzea aldeko izango zuela (Navarro bidali du kalera epaileak, 74. minutuan). Iraolak min hartu du giharretan, eta aldatu beharrean izan da Bielsa; Ramalho sartu du, eta Iraola ez izatea azkeneko minutu horietan kalterako izan da, eskuin hegaleko erasoan zutabe sendoa baita.
- Gutxi iraun du jokalari bat gehiagoz Athleticek. Laportek bi txartel hori jaso ditu minutu gutxian, eta 80. minutuan joan da kalera. Ez da aldatu Bielsaren taldea jokoan: garaipenaren bila segitu du. Eta bila joan behar horretan, gaizki egin ditu gauzak Muniainek. 87. minutua zen, eta zelaiaren erditik jo du aurrera nafarrak. Bere eskuinean, Sevillako areatik gertu, laguntza zeukan, baina beste aldera jo du, baloia berea bailitzan; galdu egin du, eta kontraerasoan, Negredok txikitu egin ditu itxaropen guztiak. Honek bai, honek asmatu egin partidak erabakitzen diren esparruan: zirt eta zart. Horixe falta izan zaio Athletici Sevillan.