‘Piano, piano’
ATHLETIC 1
CELTA 0
Hiru puntu garrantzitsu batu ditu Athleticek, eta nabarmentzeko bestea hau da: ez du golik jaso.
- Italiar erako emaitza izan da Athleticena. 1-0, eta hiru puntu. Ez du italiar estilo zurrunaren eredua erabili, ez delako Athleticen eredua, baina emaitzak ematen du jolas hori egiteko aukera. Italiarren italierako ‘piano, piano’ ere erabil daiteke partidaren itxura azaltzeko. Poliki-poliki, bidea egin du taldeak partidan zehar, eta zarata handirik gabe irabazi du. Gol bakarra alde, alerik ez aurka.
- Golik ez jasotzea bera garaipentzat hartu behar da. Bazen denbora halakorik gertatzen ez dela. Ez da Bielsaren estiloaren ezaugarri nagusia golik ez jasotzearena, baina lagun lehiala bezain egokia da partidak irabazteko. Gol bat sartzea nahikoa izaten baita hiru puntuak batzeko. Gaur horixe gertatu da.
- Ematen ez zuenean sartu du gola. Bi taldeak ari ziren nagusitu ezinda, jokoari segidarik eman ezinda erasoan, eta berdinketa egotea inork harritu ezin zuenean sartu du Adurizek. Polita izan da gola. Denetarik izan duelako. Presio eraginkorra eginda lapurtu dute baloia, hegalera eraman gero, eta Ibairen erdiraketa bikainari erremate balekoa eman dio Adurizek. Presioa, hain gutxitan azaldu izan den hori denboraldi honetan! Gaur, tarteka eraginkorra eta segidakoa izan da, eta horri esker, tarte horietan aise ibili da taldea.
- Celtari ez dio utzi atzetik baloia erraz ateratzen presioa ona izan denean. Ez da lehen zatiko aurreneko pusketaren ezaugarria izan, eroso antzean eta aurre samarrean mugitzeko modua izan duelako baloia kanpoko taldeak. Hala ere, hori gertatu denean ere, ez du asko sufritu Athleticek. Gaur dena izan da ‘piano-piano’.
- Golaren jiran estutu du ondoen Athleticek Celta. Gorago sakatu dio, eta erosoago egon da taldea. Egongo ez da ba, aurkaria bere atetik urrunago edukita! Beste kontu bat izan da estutze horri gero erasoan atera dion etekina.
- Lehen zati horretan, atentzioa eman duten bi kontu Celtaren defentsako lanean: Herrerari buruz buruko zaintza egin dio Natxo Insak (Eibarko jokalari ohia), eta horren eraginez, beste euskarriak (Oubiñak), askotan joan behar izan du gora San Jose estutzera; ondorioa, hauxe: zuloa geratu dela erdikoen eta atzekoen artean, eta Adurizek askotan parte hartu ahal izan du lerro artean jokatuz. Deigarria izan den bestea: lerroak atzeratuta ere ibili da Galiziako taldea, 4ko bi lerro osatuz, eta azkeneko lerroa dezente aurreratuz; aurreratzeko aukeraren alde egin duenez, deigarria izan da beste 4ko lerroak gutxi estutu dituela Athleticeko jokalariak, paseak oztopatzeko ezer gutxi eginez. Arrisku handiak hartzea da hori defentsako lanean, lerroa aurreratzekotan, ezinbestekoa delako pasea eman behar duenari oztopoa jartzea, atzeko lerro horren bizkarra erraz aurki ez dezan.
- Bigarren zatian, une batzuetan ireki egin da partida, baina ez batek, ez besteak baliatu dute aukera hori. Emaitzak estua izaten segitzen zuen, eta horrek eraman du kezka harmailetara. Horrek, eta irabazteko zegoen premia gorriak. Celtak ez baitu arrisku handirik sortu, De Lucasen jokaldi batean izan ezik. Garbi samarra izan du aukera, baina Iraizozek ederki itxi dizkio zulo guztiak. Hori kenduta, ez du estutasun handirik sortu Paco Herrerak taxuz zuzenduta eta landuta daukan taldeak.
- Banakako aipamenak Ramalho eta San Joserentzat. Ramalhok bete du Iraolaren lekua (inork bete ezina ematen duen leku hori), eta ondo bete ere. Nortasuna erakutsi du, eta oinarri sendoa da hori. San Jose euskarrian aritu da, Iturraspe zigortuaren ordez, eta lan ona egin du. Baloiarekin erraz aritu da, aukera logikoak aurkituz, eta defentsan ere sendoa izan da lana.