Hotz
OSASUNA 0
VALENTZIA 1
Bolada ona eten egin da, partida apala jokatu eta gero.
- Gol bat jasotzea nahikoa izan da partida galtzeko. Bost partida zeramatzan Osasunak golik jaso gabe, eta galtzaile ez zela. Gaur, batekin, punturik ez. Ondorioa: erasoan ez du ezer egin taldeak.
- Deseroso ibili da taldea, gola jaso eta ondorengo minutuetan erosotasun pixka bat aurkitu badu ere. Lehen zatian, Valentzia egin da baloiaren jabe; ez da izan egundoko nagusitasuna, baina nahikoa bai Osasuna trabatzeko. Valverderen taldeak arriskuaren kezka eraman du area ingurura gerturatu den bakoitzean. Soldadoren mugimenduak zitalak dira, eta ondo baliatu ditu zuloak.
- Valentziak baloia izan duenean, mugimendu taktiko interesgarria azaldu du: bi hegaletako atzelariak (Barragan eta Guardado) gorako bidean jarri dira (baloia zegoen aldekoa gorago beti), zelai-erdian jarriz, eta erdiko bi hegalekoak (Piatti eta Feghouli), Soldadoren parean kokatu dira, hiru aurrelariko lerroa osatuz. Horrek taldearen egitura asko mugiarazi dio Osasunari defentsako lanean, eta Etxaide batez ere, lekua galduta ibili da sarritan; zulo hori dezentetan baliatu du Soldadok.
- Erasoan jokalariak pilatzearen eraginez, presioa goian egiteko aukera izan du Valentziak. Osasnuna ito antzean eduki du, atzean asko sufritu gabe, baina atzetik baloia atera ezinda; sarritan, Llorente zelai-erdian ibili da, baloia bizkarrez erabili nahian. Horrek adierazten du taldea non egon den sartuta. Zaila da erasoan ezer egitea horrela.
- Bigarren zatian, golak aldatu du dena. Ordura arte, Valentziak arriskua sortzen jardun du kontraerasoetan, eta golak berretsi egin du arrisku hori (Soldadok sartu behar, nork bestela?). Orduan hasi da Osasuna hobeto jokatzen, berak nahi duen horretara. Joko zuzenagoa, bigarren baloiak, presioa… Cejudo zelaian jartzeak ere lagundu du horretan (Oier punta-erditik atzealdera joan da, eskuin hegalera). Baina ezin etekinik atera. Nahi eta ezin.
- Hotza izan da Osasunaren partida. Valentziak partida txukuna egin du, eta nahikoa izan zaio nagusitzeko. Valentziarrak uste baino beherago egon arren sailkapenean, aldea dago Osasunarekin parekatzen bada. Zelaian ikusi den aldea.