Gidariak, errepidean
REALA 1
GETAFE 1
Azken unean berdindu du Carlos Martinezek, taldearen gabezia taktikoak beste behin agerian geratu diren egunean.
- Getaferen aldagelan ez du ematen Valentziakoan egon diren suak daudenik. Talde batua, langilea, konprometitua, indartsua, lehiakorra izan du aurrean gaur Realak, eta jakina, halako taldeak menderatzeko (jokoan ere bai) ez da aski abilezia edota gaitasun teknikoa. Baloia lagunari pasatzea, hark kontrola egitea eta beste bati pasatzea baino gehiago behar da. Eta zerbait gehiago hori lan taktikoa baino ez da, baliabide taktikoak.
- Realak ez dauzka, ez dituelako lantzen (entrenatzailearentzat ez direlako garrantzitsuak, eta ez eman buelta gehiago). Gaur, behar-beharrezkoak ziren… bueno, gaur eta beti. Orain esan eta idatziko da bazterretan Velaren hutsunea handia dela (gaur ez du jokatu txartel horiak pilatuta izateagatik). Jakina handia dela zuloa, baina gaur huts egin duena gabezia taktikoa izan da, jokalari bat falta izateaz haratago. Eta partidan zehar, entrenatzaileak zer egingo eta, sormeneko lerroa ahuldu; begira zein izan den partida amaitu duen hiruko lerroa: Ifran eskuinetik (galduta eta alferrik galduta), Zurutuza erdian (hau bere lekuan, behintzat), eta Jose Angel ezkerrean (atzelaria erdilari). Xabi Prieto erditik hegalera mugitzea nahikoa zuen entrenatzaileak, baina ez, zelaitik aulkira bidali du (minez zegoelako izan den edo ez, ez dakigu).
- Jokalarien aldaketak negargarriak izan dira entrenatzailearen aldetik. Izan ere, Griezmann eta Chory Castro aulkirako hobeto zeuden, erakutsi dutenaren arabera. Baina ez, zelaian gorde ditu denbora luzeegian entrenatzaileak. Griezmannena handia da gero: joan zen astean, Valentzian, ez zen ondo aritu, baina gaur berriz ere 11koan, eta denbora gehiegi jokatuz, gainera. Astean zehar lan ona egingo zuen…
- Gabezia taktikoena ezaugarri honetan eta egoera hauetan geratzen da nabarmen: jokalariek baloia oinetan itsatsita eraman eta eraman egiten dute. Zergatik ez pasa lagunari? Laguna ez delako mugitzen, laguna gaizki mugitzen delako eta abar. Getafek ederki atzeratu ditu ia lerro guztiak azkar batean, baloia galdu orduko (goikoek presioa egiten zuten bitartean). Halakoei aurre egiteko, Realakoek egin ez dutena egin behar da: baloia azkar mugitu, bizi jokatu. Justu kontrakoa egin dute. Gidariak izan dira, futbolariak izan beharrean, konduzitu eta konduzitu baloia (gaztelerazko hitza erabiliz).
- Lehen zatia horrelaxe joan da, eta bigarrenari begira, gauzak aldatzeko itxaropen gutxi, taldeak beti berdina egiten duelako. Utopikoa zen aukera hau gauzatzea: hegaletako atzelariak gorago aritzea erasoan; euskarri batek erdiko atzelariekin lerroa osatzea (edo aurreraxeago aritzea); hegaletako erdilariak barrutik aritzea (edo barrura sartzea, ezustea bilatuz) hegaletako atzelariei lekua utziz; beste euskarriak aurpegiz jokatzea, jokoari norabidea emanez alde batetik bestera… azken batean, zelai erdian jokalari gehiago pilatzea erditik, Getafek leku horiek itxi eta hegalak libreago uzteko, benetan mina emateko aukerak sortuz (eta ez 1×1 egoerak, edozein modutako erdiraketekin bukatzeko, gertatu den bezala). Hori da lan taktikoa, astean zehar landu behar dena. Baina utopia baino ez da egungo Realean.
- Getaferen golak ere lotsarazi egin behar zukeen gabezia horren arduraduna. Jose Angelek baloia eraman eta eraman egin du ezker hegaletik, azkenean kendu egin dioten arte. Jokalaria ondo ez, baloia gehiegi edukitzeagatik, baina taldekideak okerrago, laguntzarik ez emateagatik atzetik. Atzeranzko pase horren garrantzia izugarri handia baita futbolean. Zenbat aldiz falta izaten da atzeko laguntza hori Realean? Askotan. Beste gabezia taktiko bat.
- Futbolean, hedatzen hasita dago lan taktikoarei garrantzia kentzeko joera. Jokalariek askatasunez jokatu behar dutela esaten dutenak asko dira. Libre utzi behar zaiela. Gaur, garbi geratu da taktika oraindik ere funtsezkoa dela futbolean. Libre bai jokalariak, baina oreka landuz gero, askoz libreago sentituko lirateke zelaian, eta gehiago gozatuko lukete, eta emaitzak ere hobeak lirateke. Baina ez, segi taktikari garrantzia kentzen…
- Erritmorik ez du izan partidak. Lehen zatian, batez ere. Getafekoak zakur zaharrak dira, eta ez zitzaienez komeni erritmoa bizitzea, egin zezaketen guztia egin dute partida geratzeko. Eta epaileak ere lagundu die, abantailaren legea aldagelan utzita aritu baita.
- Getaferen golaz, beste aipamen bat… eta beste akats larria zelai guztietan eta adin guztietan ikusten dena: erdiraketa dagoenean, atzelari guztiak baloiari begira egoten dira, errematera zein, nondik eta nola datorren ikusi ere egin gabe. Ezagutzen dudan entrenatzaile batek esaten dien bezala bere jokalariei: “Erdiratzen ari denak ez du gola sartuko! Errematera datorrenak sartuko du!”.
- Partidaren emaitzatik sailkapeneko ondorioetara: berriz ere Realak kale egin du gorunzko jauzia emateko aukera izan duenean. Galdu ez duenean, gaitzerdi. 87. minutuan jaso du kolpea, 91.ean berdindu. Jokoaren intentsitateari aipamena eginez, zuhurra izan dela esan behar, epela. Asteon hainbeste aldiz errepikatu dute jokalariek eta entrenatzaileek zuhurtziarena… to zuhurtzia! Beste aukera galdu bat.