Oso interesgarria da gaur gaueko partida. Sadar zaharrean, Osasuna eta Valentzia parez pare. Beheko zuloetatik atera da bat, konfiantzaz inoiz baino indartsuago dago, eta aukera edertzat dauka gaurkoa ere, zuloa atzerago uzteko. Bestea entrenatzaile berriarekin dator, Ernesto Valverde jarriko baita Valentziaren aulkian aurrenekoz. Jakina da zer egiten duten jokalariek halakoetan.

Bizi-bizia aurreikusten da neurketa. Bi taldeeen egoerak hala iragartzen du. Osasunak zer joko molde aterako duen ez da misterioa. Valentziarena, bai. Baina Sadar zaharrak baldintzatu egiten du jokatzeko modua (ez du zertan hala izan, baina talde asko dira moldatzen direnak).

Pentsatzen jarrita, Osasunak irabazita zer jauzi emango duen burura etortzea handia da. Atzo, gainera, Espanyol azken sailkatuak berdindu baino ez zuen egin (Sevillaren aurka, 1-1). Pentsatzea gauza bat da, eta pentsamenduak onak izatea ez da zaila; gero, zelaian erakutsi behar da. Konfantzak ezin du ‘konfiatu’ aditza ondotik ekarri, kontzentrazioa eta intentsitatea beharrezkoak izaten direlako beti. Valentziak bi ezaugarri horiek nahigabe aterako ditu, entrenatzaile berriaren kontua dela eta. Horra gaur gauerako oinarria. Hori jarrita hasi beharko du taldeak gainerako guztia eraikitzen.

Lastima Mendilibarrek 11ko bera ezin atera izatea. Sisik aberia handia du belaunean, ez du sasoi honetan gehiago jokatuko, eta Kike Sola ere ez da izango, minez delako. Aldiz, Patxi Puñal itzuliko da. Hasierako 11koan sartuko al du entrenatzaileak kapitaina? Ez luke zertan, oso lan ona egiten ari direlako Oier eta Raoul Loe. Solaren ordezkoa zein izango den ere asmatzen zaila dago.

Galdera asko aurretik. Erantzunak jakiteko irrikaz. Kutsu berezia du gaur gauekoak.