Realari beste aukera bat jarri dio futbolak: n-garren aldiz, Ligako onenen artean sartzeko aukera dauka, gorunzko jauzia emateko parada. Horretarako, Getaferi irabazi behar dio gaur Anoetan (16:00).

Istorioak, kontakizunak, gertakariak eta hitzak errepikatu egiten direnez, Realekoak ez dira batere originalak izan asteon. Jokalariez eta entrenatzaileaz ari naiz: “Zuhurtzia” hitzaren jiran egituratu dituzte hitz-aspertu guztiak. Kanpora begirako mezuak izanda ere, epelak iruditzen zaizkit. Lehen ere, antzeko egoeretan, hitz berak erabili izan dituzte, eta emaitza zein izan den ez dago gogoratu beharrik. Hitzak, hitzak direla ez da dudarik, eta zelaian erakutsi behar dela ere ados. Baina hain nabarmena da kointzidentzia hitzen eta emaitzen artean… Real lotsagabea, oldarkorra eta ausarta ikusiko al da gaur Anoetan?

Galdera beharrean, baieztapena behar lukeen esaldia da, baina zer nahi duzue esatea: ezin fidatu. Hor daude aurrekariak. Berez, Getafe jatera atera beharko luke taldeak, gaia badelako horretarako. Baloiaren jabetzan, erritmo bizian, presioan oinarrituz. Hiru ezaugarri horiek izan daitezke azkenaldiko Realaren nortasuna finkatzen dutenak, etxetik kanpoko emaitza onak lortu dituenak… Zertarako aldatu? Baina hor ere mesfidati egon behar, edozertarako kapaz baita 11koak erabaki behar dituena.

Vela ez da ariko, txartel horiak pilatuta dituelako. Antzemango du taldeak, erasoan onena izaten ari zelako.

Getaferi buruz hauxe: oso talde arriskutsua da. Sendoa defentsako lanean, eta erasoan, lehen ez zuen eraginkortasuna dauka, talentu teknikoa eta goleatzailea uztartu dituelako. Realak erne ibili beharko du espainiarren kontraerasoekin. Baina horiek oztopatzea Reala beraren mende dago… azken asteetako Reala zelairatzen bada, behintzat. Zuhurtziaren gainetik, goruntz egiteko unea da. Gaur, orain eta hemen.