San Mames zaharrak agur esan dio Europari. Azkeneko partida izan du gaurkoa, eta bere jokalari kuttunetakoak kale egin dio: Pichichi ez da jaitsi zelaira, palkoan geratu da, harrizko moldean. Berdindu egin dute Athleticek eta Sparta Pragak, golik sartu gabe.

Bukatu da Europako Liga ere taldearentzat. Sasoi honetakoa. Hirugarren egin du multzoan, eta ezin aurrera segitu. Horrelaxe atera da, eta ez dauka bueltarik. Baina sei partida hauei begiratzean, huts handi bat gogora etortzea saihestezina da: lehen partida, Hapoelen aurkakoa, etxean, mila aukera sortu eta ezin hiru puntuak bildu. Neurketa horrek laburbil dezake beste guztia.

Gaurkoaz, ezer gutxi esateko. Bielsak ordezkoei eta gazteei eman die aukera (Toquero eskuin hegalean aritu da, atzelari lanetan), eta taldea ezer gutxi erakutsi du. Nabarmentzekotan, Aymeric Laporte erdiko atzelari gaztearen lana. Horrekin gozatu behar zaleak, besterik ezean.

Lehiaketako ibiliaren pareko amaiera izan da gaurkoa: tristea. Hobe burua iraganera bidaltzea, San Mames zaharrak Europako lehiaketetan bizi izan dituen partida ikaragarriak gogoratzera. Asko izan dira eta.