Akabo. Kito. Agur. Betiko, alde batetik, baina ez bestetik.

Athleticek Europako Ligako neurketa du gaur San Mamesen. Sparta Praga aurkari (21:05). Azkenekoa denboraldi honetan, ez baitu aukerarik lehiaketan segitzeko. Agur. Baina ez betiko. Itzuliko da.

Beste agurra. Sakon-sakona. Lehiaren unean-uneko izaeratik urrun dagoena. Lehia askoren lekuko izan dena. San Mames honetan ez da gehiago Europako lehiaketarik izango. Gaur da azkenekoa.

100 urteko historian, makina bat taldek jokatu izan du San Mamesen. Izen handikoak, ez hain handikoak… denetik. Ondo gordeta izango ditu zelaiak denen oroitzapenak, zirrikituren batean. Betirako berarentzat.

Nola ahaztu UEFAko final hartako aurkaria: Juventus.

1968-69ko Liverpool handi hura ezin gogora ekarri gabe utzi. Iribarri ‘Aingeru hegalaria’ ezizena jarri zioten ingelesek kanporaketa hartan.

Joan zen denboraldi ahaztezineko Manchester United hari buruz zer esan…

Eta Newcastleen aurkako partida loriatsu hura? Ondo gogoan izango du Josu Urrutia presidenteak…

Zenbat horrelako, zenbat gol, zenbat poz, zenbat tristura… Denak gordeko ditu San Mames zaharrak, eta Barria egin orduko, belarrira xuxurlatuko dizkio bizi izandako guztiak, historiaren katearen lotura eten ez dadin.

Ez adiorik.