Gol gehien jaso du: zergatik?
ATHLETIC (analisia)
Defentsako lana bakarrik ez da arazoa. Badira beste akats batzuk ere.
- Hogeita hamabi. Hartu sailkapena, begiratu Athletici sartu dizkioten golak 14 partidatan, eta 32 azaltzen da. Eman begiratua beste hemeretzi taldeen alor horri, eta inon ez da azaltzen kopuru handiagoa. Athletici sartzen zaio gola errazen. Zergatik?
- Kontrako golen errudunak atezaina eta atzelariak izatea oinarri sendorik gabeko esana da. Talde osoarena da ardura. Eta ez bakarrik hori, erasoko lanak ere eragina dauka defentsakoan. Athletic honetan nabarmena da hori. Gero azalduko dugu zergatik.
- Geldikako jokaldietan, asko sartu dizkiote. Horrek zerbait esan nahi du. Hor arazoa dauka taldeak. Golak jasotzearen arrazoietako bat da hori.
- Buruz buruko zaintzak. Askotan erabiltzen ditu Bielsak, eta hor ere jarria dago erruaren pisua. Ez dira asko erabiltzen egungo futbolean. Joan zen sasoian ere erabili zituen Bielsak, eta orduan, berrikuntza zen (baliabide zaharra bada ere, lehengo futbolean erabilia, alegia); orain, astakeria da. Buruz buruko zaintzak egiteko, ezinbestekoa da taldea batuta egotea; hau da: lerroen arteko eta lerro barruko distantziak hobe txikiak izatea, betiere laguntzak izan ditzan buruz buru zaintzen ari denak.
- Lerroen arteko distantziak eta lerro barrukoak. Horra muinetako bat. Nola lortzen da hori? Erraza da baloia galdu eta lerroak atzeratuta lortzea, aurkariak ez badu baliatzen lerroak atzeratu arteko denbora hori. Baina Athleticek presioaren aukera erabiltzen du (edo erabili nahi izaten du). Presioa egiteko ere, ezinbestekoa da lerroak batuta egotea. Nola lortzen da hori? Erasoa-defentsa lanarekin du lotura estua. Ondo erasotu behar da, orekarekin, gero defentsako lana orekaz eta bateratuta egiteko. Ondo erasotzen al du Athleticek orain?
- Horra lehen puntuan aipatua: erasoko lanaren eragina. Joan zen sasoian baino dezente okerrago dabil erasoan taldea, eta erasoa esatean, ez dugu murriztu nahi golak sartzeko arlora bakarrik. Erasoan asko ari zaio kostatzen jokaldiak lotzea. Ezin du lehengo oreka hori lortu, eta bi ondorio dauzka: baloia ez du goian galtzen, presioa zailduz, eta defentsa-erasoa trantsizioan baloia galtzea (norbere areatik gertu antzean edo zelaiaren erdian) oso arriskutsua da (eta oso zaila gero presioa lantzeko). Ondorioz, laburbiltzeko: presioa du helduleku Bielsak, baina ezin du taldeak erabili; ez behintzat, nahiko lukeen bezain eraginkor, erasoan ez duelako orekarik eta jarraitutasunik.
- Atezainaren eztabaida ere badabil bueltaka. Ezin da ezkutatu zenbaitetan huts egin duela Iraizozek, baina beste horrenbestetan edo gehiagotan, golak eragotzi ere bai. Horrek esan du lan asko izaten ari dela. Eta lan asko izateak esan nahi du talde osoa ez dabilela ondo defentsan. Arrazoiak oraintxe eman berri ditugu. Gure ustez arrazoi direnak, betiere.
