OHAR GARRANTZITSUA: Eduki guztiak ikusteko aukera dago gurean, ezer ordaindu gabe
FUTBOLMAMIA.COM Hainbat aldaketa egitera goaz, eta bat horixe da: ordainduz erregistratzekoa kendu eta borondatezko laguntza emateko aukera jarri dugu.
kaixo,
aldaketa garaia da gure txoko honetan ere, eta horiek jakinaraztera gatoz.
Duela 10 hilabete jarri genuen martxan gure egitasmo hau, eta badoa aurrera; eta bide berean segitu nahi dugu, aurrera beti. Komunikazio digitalaren hau oso mundu aldakorra da, eta etengabekoak dira aldaketak. Eta aldaketak egin ezean, atzean geratzeko arriskua handia da.
Guri ere tokatu zaigu zerbait aldatzeko garaia, eta aldaketa nagusia hauxe da (beste aldaketak sartzen joango gara):
- Eduki guztiak irekian jarriko ditugu. Ez da ezer ordaindu beharko edukiak ikusteko, orain arte ez bezala. Orain arte, hainbat eduki ikusteko hileko kuota bat geneukan jarria, erregistratu egin behar zen; ez zen guretzat dirua irabazteko asmoz, gure lanari balio bat emateko baizik. Orain ere nahi dugu gure lanak balioa izatea, baina nahi dugu era berean, mundu guztiak izatea gure lana ikusteko aukera. Horregatik izango da debaldekoa edukiak ikustea. Ordaintzearena ez dugu erabat ezabatu; izan ere, borondatezko laguntza eman ahal izango du nahi duenak, web gunearen orri nagusian horretarako jarri dugun leku honetan sartuta.