Zuk nahi duzunarekin sufritzen
BARTZELONA 5
ATHLETIC 1
Espero zena gertatu da, eta ezusteak zirrikiturik ere ez du izan.
- Bartzelonaren aurka jokatzea maitasunaren parekoa da. Maiteko zenukeen baina maitatzen ez zaituen beste horren parekoa. Zuk nahi duzu bera bezala jokatu, zure taldeak halako nagusitasuna izatea, baina berak ez du nahi zurekin, eta gainera, garbi esaten dizu ez duela nahi.
- Bielsa prentsaurrekoan zela, Bartzelonak nola jokatu duen azaldu du. Ezaugarri horiek guztiak itsatsi nahi ditu bere Athleticen, bere estiloa da (Bielsarena) Bartzelonarena, baina Bartzelonak aukeratzen du zein bikote nahi duen, zeinekin ligatu nahi duen. Eta momentuz, bere buruarekin bakarrik dihardu.
- Bat, bi… eta bost. Golak kontra. Bakarra alde, Ibairena. Okerrena da ez dela ezustea. Espero zela. Ligako beste talde guztiek espero duten bezala. Alferrik da Bartzelonako neurketatik ondorioak ateratzea. Esango dira gogo faltarena, adorerik ezarena… baina ez. Bartzelona beste orbita batean dabil, eta futbolean eredu eder batekin jokatuz jolastu egiten du aurkariekin. Eta txiki uzten ditu. Athleticena ez da salbuespena.
- Sufrimendua da Bartzelonan aritzea. Ez ezkutatu errealitatea. Baina ikasgaia ere bada. Oso aberatsa delako Bartzelonaren jokatzeko eredua. Hartu, ikusi, aztertu, berriz ikusi, berriz aztertu, ikasi, ikasten segi… eta umeei erakusteko modukoa edozein klubetan (ez kopia dezaten, ikasteko baino), eta entrenatzaileei entrenatzaile eskoletan. Zenbat kontzeptu oinarrizko (galduak direnak ia beste edonon), zenbat mugimedu zuzen eta orekatu… Sufrituz ikasteko balio du, behintzat, eta horra alde ona.
- Motza gaurko kronika. Ez dago zer kontatu handirik. Askotan ikusitako lana baita gaur ikusi duguna.