Azkeneko lau partidetan, golik ez diote sartu Osasunari, eta ez du alerik galdu lau horietan. Horra bide ona.

Bihar, ostirala, ezin du bide horretatik atera. Rayok ezin dio golik sartu. Horrek behar du izan garaipenaren oinarria. Ikusirik kanpotarrek golak erraz jasotzen dituztela, Osasunak bat edo beste sartuko diola ia ziurtzat jo daiteke (halako ziurtasunez aritzea futbolean atrebentzia handia bada ere). Jaso ezean, hiru puntuak Sadar zaharrean geratuko dira.

Bada premia horretarako. Zuloan baita taldea, azkenaldian urratsak aurreruntz egiten ari bada ere. Eta zulotik ez da atera, urratsak txikiak izan direlako. Golik ez badu jaso eta zuloan baldin bada, garbi dago zein izan duen oztopoa azkenaldian: golak sartzeko zailtasuna. Gaur, itxuraz behintzat, aurkari egokia du golak sartzeko.

Mendilibarrek esan du: “Rayo oso ausarta da”. Geratzen asmatuz gero, berari min ematea beste taldeei ematea baino errazagoa da. Baina geratu egin behar. Osasunari ez dugu uste komeni zaionik joan-etorri biziko partida; hau da, neurketa irekia. Horretan hobeto moldatuko da Rayo, ziurrenik.

Hortaz, aurkaria lotu, eta gero, errematea eman.