Bartzelonan da Alavesen, eta 21:30etik aurrera, Camp Noun aritu beharko du. Espainiako Kopako final 1/16ak jokoan, itzuliko partida. Joanekoan 0-3 galdu zuen. Hortaz, (ia) erabakita dago kanporaketa.

Hori horrela izanik, galdera nagusia gaurko: gozatu ala sufritu egingo dute Alaveseko kideek gaur gauean? Bietatik, ziurrenik. Alde batera, zirrara berezia eragingo die halako zelai itzelean eta ezagunean aritzeak. Bartzelona handia parean izatea ere sekulakoa da. Baina beste aldera, sufritu ere egin dezakete, baldin eta Bartzelonak ohiko joko birrintzailea egiten badu. Gol zaparrada jasotzen ari badira Alavesekoak, gozamen gutxi bizi ahal izango dute.

Eskatzen hasita, joanekoan bezain lehiakor aritzea eska dakioke Alavesi. Baina jakina, ez da gauza bera Mendizorrotzan aritu, zaleen aurrean, edo Camp Noun jokatu, bere handitasun osoan. Bartzelonak egiten duenaren mende dago neurketa. Etxekoek nahi badute aurkaria txiki uztea, ez du gau gozoa izango Alavesek; aldiz, lasaiago aritzea erabakitzen badute, gozamen puntua biziko dute arabarrek.

Kanporaketako garaileak Kordoba dauka zain hurrengo kanporaketan. Zeruak eta lurrak bat egin ezean, ez da Alaves izango.