Bi partida, bi emaitza, eta bi ondorio, Espainiako Kopako final 1/16etako itzuliko partidetan: Osasunak irabazi egin dio Sportingi (2-0), eta aurrera jarraituko du lehiaketan. Realak berdindu egin du Kordobaren aurka (2-2), eta beste behin, adio esan dio Kopari.

Osasuna-Sporting (2-0)

Berea egin du taldeak. Saiatu kanporaketa iraultzen (1-0 galdu zuen Gijonen, joanekoan), aukerak sortu, eta golak sartu, kanporaketa gainditzeko. Ez dago gehiago eskatzerik. Eta berriz ere, golik ez du jaso, azken partidetako joerari eutsiz. Gau biribila. Erasokorra izan da Mendilibarrek atera duen taldea, batera aritu direlako Manu Onwu, Llorente, Lamah eta Torres, besteak beste. Golak sartu beharra zegoen, eta golegile sena duten ia denak, zelaian.

Golak bigarren zatian egin dituzte. Llorentek aurrenekoa, Rubenek bigarrena. Horra behar zituzten bi golak lehiaketan segitzeko. Eta Ligari begira konfiantza hartzen segitzeko ederki etorriko zaio gaurko garaipena eta kanporaketa gainditzea. Rayo dator ostiralean Sadar zaharrera. Eta Kopan, Valentzia izango da ziurrenik hurrengo aurkaria.

Reala-Kordoba (2-2)

Berriz ere kale Realak Kopan. Enegarren aldiz. Hiru goleko aldea atera behar zion Kordobari (joanekoan 2-0 galdu eta gero), eta irabazi ere ez du egin neurketa. Eta zaleak haserre beste behin, Montanierren lepoa, burua eta gainerako guztia eskatzen zuzendaritzari.

Irabazten hasi da Reala, Griezmannen golarekin, eta oraindik 70 minutu zeuden jokoan. Aukerak izan ditu, ezer gutxi eginda sortutakoak, dena esaten hasita. Baina izan ditu; asmatu ez, ordea. Bigarren zatian, bigarren gola gertu antzean zegoela ematen zuenean, Kordobak sartu du berea geldikako jokaldi batean. Handik gutxira bigarrena ere sartu du. Akabo festak Anoetan! Agirretxek egin du berdinketarena, neurketa bukatzear zela.

Ligako ibili txukunak zuzendu egin du nolabait giro okerra, baina gaur, berriz ere sua piztu da (inoiz itzali al da?).