Ez itxi eta ez zabaldu (atea)
ATHLETIC 1
DEPORTIVO 1
Athleticek garesti ordaindu du golak sartzeko aukerak huts egin izana.
- Ateak zuen giltza San Mamesen, eta giltzak eskuan geratu da Athletic, atea erabat ireki ezinda. Itxi ere ez du behar bezala itxi, eta zirrikitu batetik sartu zaio Deportivo bi puntu lapurtzeko. Atearen atzean, uztaren emaitza hauxe: ale bakarra. Gutxitxo sailkapenaren plazan loriatsu ibiltzeko.
- Aldagelako atetik atera dira Athleticeko jokalariak zelairako bidera. Titularrak eta besteak. 11koa ikusi eta oroitzapena joan zen denboraldira joatea, ia dena bat: Javi Martinezen ordez Ekiza; horra ezberdintasun bakarra. Baina joan zena joanda dago, eta ematen du ez dela itzuliko. Golak ez dira bakarrik sartzen, baina hau esan daiteke: lehen sartzen zirenak orain ez.
- Atea zulatu egin behar da sarean sartzeko. Lehorretik, zerutik edo itsasotik. Tiroak botatzea da lehenengo pausoa (bueno, atearen ingurua heltzearen ondotik). Bota, bota ditu Athleticek makina bat, baina punteriaren makinaria zorrotzak kale egin, nonbait. Ezin atea asmatu. Atearen inguruko zaintzaile, argazkilari eta publiko, horiek izan dituzte gaur zehar-kalteak tiroen burrunban.
- Baloia bero atera da gaur. Sarea ferekatzeko irrikaz. Heldu eta besarkatu nahi zion, muxu zuri-go(r)riak eman. Baina behin bakarrik gauzatu du amets bustia San Mameseko baloiak. De Marcosek eraman du baloia sarera. Ikusirik alde horretan jai zeukala, ez zuela ligatuko, beste aldekoengana joan da, arrakasta izateko itxaropenean. Behin bakarrik lortu du hangoekin ere. Abel Aguilarren bitartez laztandu du sarea baloiak bigarrenez.
- Gelak atea behar du. Sartzeko eta irteteko. Dotore atera da Athleticen gela gaur. Apain egon da. Kolore biziekin. Baina ateak huts. Beste gela batekoak ematen zuten. Itsusiak erabat. Ez dira bat etorri gelaren dotoreziarekin. Nork jarri ote ditu hain baldar eta oker?
- Gaur ireki beharreko ateak lasaitasun handiaren gela zuen parez pare. Hortik gora dago beste gela, loriatsuena. Ezinbestean igaro behar da lasaitasunaren gelatik bestera heltzeko. Izan du ba parean atea Athleticek, baina ez du behar bezala ireki, eta ireki duenean, ahaztu egin zaio ixtea. Ez da lehendabiziko aldia: zenbat bider ez ote zaio gertatu aurretik joan eta aurkariak gero berdintzea?
- Hurrengoan jarriko zaio berriz atea parean. Bueno, hurrengoa Bartzelonan egongo denez, agian hemendik bi asteko atea aipatu beharko da. Gaur erakutsi du baduela gaia ateak zabaltzeko. Edozein (edo ia edozein) zabal dezake, baina berari ere edonork zabaltzen dio. Hor du lana Bielsa arotzak.