Gaurko giltza ateko giltza ondoen erabiltzen duenak izango du. Athleticek 26 gol jaso ditu, Deportivok 27. Partidako bi pasatxo bi taldeek. Asko da. Sartzerakoan batezbesteko hobea balute, hainbestean, baina ez dabiltza eraginkor aurrealdean ere.

Bi taldeen defentsako lana ikusita, batek eta besteak izan dezakete erasoko eraginkortasuna hobetzeko aukera.

Hortaz, ondo defendatu eta ondo erasotu beharko du Athleticek hiru puntuak pilatzeko. Oreka, hitz batean esanda. Orain arte, oso gutxitan azaldu izan den hitz hori. Horrek ez du esan nahi taldea gai ez denik oreka lortzeko. Gaia badago, eta bada garaia erakusten hasteko.

Irabaziz gero, sailkapenaren erdialdera egingo luke jauzi. Eta bide batez, zuloan den aurkaria beherago botako luke. Hiru punturekin sei lortzea bezalakoxea litzateke.

Izango da berrikuntzarik 11koan. Aduriz zigorra bete beharrean da txartel horien pilaketagatik, eta Llorente ariko da hasieratik. Partidak berak baino arreta gehiago bereganatzen badu, malo. Hartzekotan, golak sartu dituelako hartu beharko du arreta. Baina hori lortzeko, azaldu beharko du beste aldarte bat, orain arte apenas erakutsia.