Rafa Benitez bizi da. Ez du lurrak jan. Aulkietara itzuliko da, non eta Chelsean. Denbora luzez egon da lan hori egin gabe: bi urtez, hain zuzen; 2010eko abenduan bota zuen kalera Inter Milanek. Orain, kanporatu duten beste baten lekuan bera ariko da: Roberto di Matteo ordezkatuko du.

Talderik ez duen entrenatzaile batek bi urtean gauza asko egin ditzake. Ikasten segitu, esaterako. Benitez langile petoa izanik, ez da dudarik ikasten ibilia izango dela tarte luze horretan. Beste zeregin batzuk ere egin ditu, futbolarekin lotutakoez ari gara, eta hor da bere web gunea. Futbolari buruzko web egokia, irakasle lanetan Benitez maisua dela. Emankorra da ataria, eta oinarri ona futbola bere horretan ezagutzeko.

Bistan da ez dela geldirik egotekoa. Futbola ikasi, irakatsi… eta hori dena egiteko, aztertu egin behar. Aztertzaile trebea da, eta xehetu egiten ditu taldeak. Hemen adibide bat, hau ere bere web gunetik hartua.

Ingalaterrara joan zen 2004an, Liverpoolera, eta han segitzen du. Bertan bizi da, eta herrialde hartan izango du lanean berriz hasteko aukera. Bi urte luze hauetan, talde askori lotua azaldu da bere balizko fitxaketa, baina lanik gabe segitu izan du. “Egitasmo sendoak gustatzen zaizkit, eta ez dut edonon eta edozein moduz entrenatuko”, adierazi izan du. Chelsearena sendoa iruditu, nonbait, eta berriz ere lanean da Benitez.

Futbolarentzat albiste ona, ezbairik gabe. Galdu antzean den arlo taktikoaren lantze zehatzak eskertuko du.