Oztoporik gabeko bidea
REALA 4
RAYO 0
Realak aise menderatu du Rayo, jokoan eta eraginkortasunean. 11koa Malagako bera atera du Montanierrek.
- Zer nahi duzue esatea halako emaitza handia lortu gero… Bada, jokatu aurretik irabazi duela Realak partida. Montanierrek 11koa erabaki duenean edo zuenean (noiz izan zen ez dakigu eta). Malagan iraultza eragin zuen bera. Teknikoki onenak, zelai-erdikoak eta hortik gorakoak. Bai, Ruben Pardo, Illarramendi eta gainerakoak.
- Baloia gustura etorriko da berriz ere Anoetara, hain leun eta gozo ukitzen badute. Pardo eta Illarra lagun minak ditu. Hori da hori defentsako lana eta erasokoa lotzen hastea. Pase motzak, luzeak… buruz burukoak…
- Jokalarien aukeraketa horri eutsiz gero, Rayoren eredua arrisku asko hartzea da. Baloia hartu orduko, asko luzatu du taldea, zuloak utziz geroko lanetarako (defentsarako). Realak dotore baliatu ditu zuloak, abiadura eta teknikan oinarrituz. Ai, taktikoki landuxeagoa balego taldea!
- Golak sartu ahala indartu egin da jokalarien konfiantza, eta golak jaso ahala, gutxitu Rayoren indarra. Aurkariek bazekiten zer zetorkien gainera. Azkar konturatu direla eman dute aditzera. Egiten zutena egiten zutela alferrik zela.
- Ifrani baliorik gabe utzi dioten golak iragarri du ondorengoa. Hasierako minutua edo zen. Gero, Velak sartu ditu bi, minutu berean (22.aren bueltan). Akabo partida… eta biba festa!
- Bigarren zatian, Mikel Gonzalezen golak erakusten du jokalarien konfiantza maila. Berak lapurtu baloia atzean, beste alderaino segitu (Velak erdiraketa ederra egin, Ifranek buruz jo) eta gola sartu. Libre aritu dira gaur, konfiantzaz. Oinarri sendoenetakoa da, dudarik gabe. Eta hori eskertu egiten dute denek; galdetu bestela Chory Castrori, laugarren golaren egileari.
- Rayok aldatu egin du marrazkia bigarren zatirako: 3 atzelari bakarrik jarri ditu. Lehen erraztasunak, gero autopista debalde! Kontraerasoan txikitu egin du Realak.
- Erasoa eta erasoa bai, baina defentsako lanaz zer? Baloia gora eramaten denean, baliabide ona da han bertan presionatzea, aurkaria itotzeko. Hori egin du gaur Realak une askotan. Baloia berreskuratzea eta erritmoa bizitzea ekarri dizkio presioarenak.
- Beste batzuetan, lerroak atzeratu ditu. Hala erabakita zegoelako izan den edo ez, ezin jakin. Izan ere, goiko artistei lanerako gogoa joaten zaienean, taldeak lerroak atzeratu baino ezin du egin. Eta hor dezente sufritzen du taldeak. Aldiz, goikoek presioa egitean, atzelarien eta erdi-erdikoen lerroak gorago jartzen dira. Horrela hobeto moldatzen da taldea, eta ez da hausten.
- Bidegurutzean zen Reala gaueko 9.30ean. Orain, bidean da, oztoporik gabeko bidean lehen pausoak ematen dabil. Oztoporik gabekoan segitu beharra dauka. Eta oztopoak nahikoa jartzen dituzte aurkariek, etxe barrutik jartzen hasi gabe. Logikak eramango du taldea bide onean.