Partida guztien ondorenean, taldeek bide bat edo beste bat hartzen dute. Emaitzaren araberakoa. Sailkapena da.

Hori gertatu aurretik, bide gozoena izaten dute gogoan taldeetan, sailkapenari begira jartzean. “Irabazten badugu gaur…”.

Bada, gaur, Realak irabazten badio Rayori (21:30, Anoeta), gorako bidean jarriko da, sailkapenaren erdialdean, baina behetik gorunzko pausoa emanda.

Horra gaurko lehen bidegurutzea. Beste bat ere bada, emaitzaz haratago doana, sakonagoa: hainbat jokalariren aldeko apustua indartzea edo ez.

Malagan, Ruben Pardorengan islatu zuten aurrekoarekiko aldaketa. Bi euskarrien inguruko eztabaida zaharra da (birekin aritzen bada, jakina): bat defentsakoa, bestea erasokorragoa, biak erasokorrak… Bat Illarramendi izango da; eta bestea (edo besteak?, 3koa osatzen badu)?

Malagan ikusi zen erasoan arriskutsuagoa dela Reala teknika onena dutenak zelaian direnean. Logikoa da hala izatea. Jokalari aurreratuenak abilak direla badakigu. Eta horien atzekoak abilak izatea ere ona izango da.

Rayok erasokor jokatzen du, baloiaren erabilera doituan oinarrituz. Irekiak dira bere partidak. Golak sartzen ditu, baina jaso errazago: 25 egin dizkiote orain arte Ligan.

Realak Malagakoari eusten badio, eta Rayo egungo Rayo bada, irekia izango da neurketa. Eta izan daiteke gol askokoa. Montanierrek kezka apurren bat izan dezake horretan 11koa zehazterakoan, baina kezka aukera bezala ikusi beharko luke: onenak zelaira (onenak teknikoki)! Eta beldurtu, Rayo beldurtuko da.