Uzta txikia
OSASUNA 0
MALAGA 0
Golak sartzen ez zuen asmatu Osasunak, eta zuloan segitu beharko du.
- Galdera batzuei erantzuna ematea oso zaila izaten da. Bila eta bila aritu arren, aurkitu ezin. Atzo, Sadar zaharrean, nolatan ez zion irabazi Osasunak Malagari? Partida bera modu berean beste hamar aldiz jokatu, eta bederatzitan Osasunak irabaziko zuen. Baina atzo ez.
- Erantzunaren bila, dena arrazoitu behar horretan, bada bat egokia: golak sartu behar dira irabazteko, eta Osasunak ez zuen asmatu horretan. Kike Solak eta Cejudok handi samarrak huts egin zituzten. Batean, asmatu zuen Kike Solak, neurketa hasi eta berehala, baina epaileak ez zion balekotzat eman.
- Osasunaren estiloa, eredua azaldu zen atzo. Presioa, erritmo bizia, hegaletatik aritu… Presioak askotan eman zion baloia, eta gero, hainbat baliabide erabiliz, arriskua eragin zuen. Besteetan baino baliabide gehiago atera zuen, eta aurrerako urratsa egitea da hori.
- Estiloarena eta baliabideena oinarri sendoa da aurrera begira. Edo hala izan behar luke, bide horretan segitzea funtsezkoa izango baita.
- Bigarren zatia da adibide. Euskarri horietan babestuta, nagusi izan zen Mendilibarren taldea. Baina hasieran esandakoan kale: golik ezin sartu. Aurreko asteburuan, hiru egin, eta oraingoan alerik ez. Zergatik? Galdera batzuen erantzuna aurkitzea zaila izaten da.