Beste modu batean, baina kolpea, bera
BETIS 2 REALA 0
Oldarkorrago eta biziago aritu arren, galtzaile berriz ere, geldikako bi jokalditan jasotako golen eraginez eta aukera garbiak ez sartzearen erruz.
- Emaitzen diktaduran, azal iezaiozu Realeko zaleari Realak partida ezberdina egin duela etxetik kanpo gaur, Betisen zelaian. Ez dela besteetan bezain epel eta makal (abiadura) aritu. Izan dituela golak sartzeko aukera dezente. Une batzuetan, Betis estu-estu hartu duela. Esaiozu hori zaleari, eta azker erantzungo dizu: “Eta? Beti bezala galdu du, ordea”.
- Partidaren emaitza bi areen inguruan gertatuak zehaztuko balu, Reala aise irabazle. Baina atearen aurrean asmatzeak eta ez asmatzeak balio du kirol honetan, eta hor Betis garaile. Bi geldikako jokaldi baliatuz, zirt eta zart egin dio Realari.
- Ezberdina izan da gaur Reala. Oldarkorrago taldea defentsako lanean (ez, akaso, behar zuen hainbeste), eta biziago erasoan. Hala ere, ez dio balio izan puntu ale bat ere pilatzeko.
- Une batzuetan, estu hartu du Betis, eta hor behar zuen erabateko oldarkortasuna atera, presioa eginez eta ez lerroak atzeratuz, Betis eroso aritzen baita utziz gero. Inoiz ez da jakingo zer gertatuko zen presioarena gauzatu izan balitz, baina…
- Aldaketen kontua: Betisek azkar mugitu ditu jokalariak, zerbaiten (edo askoren) beharrean zelako. Eman diote hori aldaketek. Realari, ordea, eman baino kendu gehiago egin diote. Gutxi asko, Zurutuza kentzearekin batera itzali da taldea (min hartuta joan da). Eta Vela joateko unea ere bera izan denez, ilunpea hortik aurrera.
- Vela aipatuta, berak egin du dena gaur. Golak sartzeko aukera on batzuetan kale, eta Betisen lehen goleko jokaldiaren sorburua bera da: inozo-inozo baloia galdu du zelai-erdian, erasoko aukera on batean, eta jokaldi horretan izan du aldeko kornerra Betisek, golarena.
- Realak partida ona egin du teknikoki. Pena da teknikako lan horri taktikoa ez gehitzea. Zenbait mugimendu zehaztuta balitu, etekin handiagoa aterako lioke joko mota honi, baina entrenatzaile bakoitzak bere metodoak dauzka. Eta partida berean, kontzeptuak nahasi egiten dituela ematen du; hau da, eredua baduela, baina eredu hori indartzea edo finkatzea falta zaiola; defentsako lanean, kasu: zergatik orain presioa goian, eta handik bi minutura lerroak atzeratu presioa egin daitekeenean?
- Betiseko hirugarren atezaina ariko zela eta, irria Realeko zaleen artean, pentsatuz ez dela ona izango. Eskerrak! Adrian izan da bere taldeko onena, eta beragatik ez balitz, oraingo kritika eta haserre guztiak beste muturrean leudeke.
- Ondorioa: Realak hobetu egin du etxetik kanpoko jarduna beste egun batzuen aldean, baina geldikako bi jokalditan ihes egin dio partidak. Horretan eta Adrian gainditzen ez asmatzean. Kolpea azken finean. Beste bat. Modua izan da ezberdina, baina mina bera.