• Iraganari begira geratzeak ez du ezertarako balio oraina belzten denean. Kalte handia egiten du. Hortaz, Athleticen jarduna aztertzean, lehengoa ahaztea hobe. Gaur, gaurkoa. Eta gaurkoa aztertu behar da, Pragan jokatu eta galdu duena (3-1).
• Eta gaur ere ez du partida biribila josi. Urrun dago egun asmo hori gauzatzetik. Hainbat arrazoi tarteko, gaurkoari erreparatzen bazaio.
• Batetik, joko landua landu ezinda ibili da. Ezin kateatu jokalariak baloiaren bidez. Horrek erritmoaren kontrola galtzea dakarkio, eta zerbait behar badu Bielsaren taldeak horixe da: erritmo bizia.
• Erasoan, espazioak edo lekuak orekaz ez ditu bete: edo gertuegi elkarrengandik edota urrunegi jokalariak.
• Erasoan erritmorik gabe indarrik ez du izan taldeak, eta ez da gora iritsi. Lehen zatian nabarmena izan da gabezia hori. Eta ondorioa du horrek defentsako lanean: ezin presioa goian egin. Horixe du indarra defentsan, eta hori ere ezin garatuta ibili da. Ondorioz, atzean sartzen joan da pixkanaka, eta Spartaren mende geratu da.
• Lehen bi golak argigarriak dira alde horretatik: jaurtiketa bat area ertzetik, aurrenekoan, eta area barruko erremate bat bigarrengoan, Adurizi jo eta bere atean sartu aurretik.
• 2-0 atsedenaldira, eta lehendik pilatutako pisuari zama hori gehitu behar. Hala ere, taldeak ez du amore eman, eta bigarren erdiaren hasierako minutuetan, lan txukuna egin du. Gabeziak pixka bat zuzendu, eta gora heltzen ibili da, eta horrek presioa ekarri du ondoren, eta Sparta atzean sartuta egon da.
• Baina berehala joan dira asmo onak hor zehar. Penalti baten bidez, hirugarrena. De Marcosek egin du gola ondoren, baina ordurako erabakita zegoen emaitza.
• Baten batek esan lezake txekiarren golak ez jasotzeko modukoak izan direla (Iraizozen hutsa, Adurizen zorte txarra, eta Castilloren akatsa), eta tentazio handia eduki lezake bat edo bestek zorte txarrarena gogora ekartzeko. Aukeran, nahiago arazoei parez pare begiratu, konponbideak lortzeko.
• Ilunetan segituko du klub osoak, eta hor ez da argirik egoten. Sortu egin beharko dute denen artean, bilatu… aurkitzeko. Beste aukera bat emango die futbolak datorren igandean, Osasunaren aurkako derbian.

Jardunaldiko emaitza guztiak

Sailkapenak