Gizakiok arnasa bezala behar du Athleticek baloiaren jabetza. Bestela, ito egiten da. Atletico Madrilek bi eskuak jarri dizkio lepoaren bueltan, estutu latzak eman, eta garbitu egin du. Baloia erabiltzen ez dio utzi, hasiera-hasieratik, eta ekin orduko itzali du Athletic.

Lehiaren lehen unetik ikusi da ez zegoela eroso Bielsaren taldea. Ezin ba gustura egon, baloia erabili ezinda. Bazetorren gola, lehenago edo beranduago helduko zen ustea nabarmena zen. Eta heldu da, eta beste askotan bezala, Falcaok sartu du.

Horra hondamendia iragartzen zuten bi osagaiak: Athletic baloia jokatu ezinda, itota, eta Falcao gola sartzen. Bakarra izan bazen, gaitzerdi. Beste bi ere egin ditu, hiru denera, eta laugarrena Tiagok sartu du. Beste gol zaparrada batekin blai dago Athletic. Betisek bost egin zizkion lehen jardunaldian, Atleticok lau. Bederatzi bi partidatan.

Zenbakiekin segituz, puntu alerik ez du bildu, eta azkena da sailkapenean. Azkena egon zen azkeneko aldia 2005-2006 sasoian izan zen.

Orain, eskerrak beste partida bat duen asteon. Etzi izango da, Helsinkin, Europako Ligan aritzeko azken kanporaketakoa. Han da taldea, gaur goizaldean joanda, eta partida jokatzeaz gain, beste lan batzuk ere izango dituzte; esaterako, bart gauekoa aztertu, txarrak zuzendu eta burua bere lekuan jartzea. Deialdian, aldaketak egin ditu Bielsak, eta jokalari hauek Bilbora itzuli dira: Iraizoz, Herrera, Gurpegi, Aduriz eta Iraola. Joaneko 6-0ekoak horretarako aukera ematen dio Bielsari.