Horrela bai
EUROKOPA 2012
Portugal finalerdietan da, Txekiari irabazi eta gero (1-0). Nagusitasunez sartu da lau onenen artean.
- Portugal hau ez da lehen fasekoa. Arriskatu gabe arrisku handietan ibilia lehen, arriskuak hartuz beste partidetan baino arrisku gutxiagotan ibili dena gaur.
- Txekia baino hobea dela erakustera atera da, nahiz eta hasierako minutuetan, Txekiari utzi dion ekimena hartzen. Hortik aurrera, beste modu batera jokatu du: baloiaren jabe egin da, txukun mugitu du, pazientziaz, eta Txekiaren area ingurura iritsi da; galtzen zuenean, presioa egin du, oso goian, eta hortik izan du nortasuna. Txekiarrak jan egin ditu.
- Presioarekin itota egon dira Cechen taldekideak. Baloia ondo antzean mugitzeko gaitasuna dute, baina baliabide hori indarrik gabe egon da gaur, portugaldarren erruz. Estrategia ona Paulo Bentorena.
- Cristiano Ronaldok barrutik jokatu du gaur (ere). Jokoan gehiago sartu da, eta egundoko sarraskia eragin du Txekiako bi euskarrien artean aritu denean (Hubschman eta Plasil).
- Erritmo ez oso azkarrean mugitu du baloia garaileak, baina azkarrago egiten dakiela erakutsi du. Lehen zatian izan da, jokaldi batean, eta txekiarren defentsako lana hankaz gora bota dute.
- Gola: Cristianok egin du 79. minutuan. Baloia eskuin hegalean, Moutinhok bikain puskatu du barrutik barrura, txekiarren lerroak hautsiz, eta erdiraketa bikain baliatu du taldeko izarrak, baloiaren bila joanez. Errematea ere eskoletan erakusteko modukoa. Bikaintasuna apaltzeko, eta hau ere eskoletan ematekoa: atzelari denak baloiari begira jarri dira (denek edo ia denek egiten dutena), eta atzetik Cristiano bazetorrela ez du inork ikusi. Txapelketa bikaina egin duen Gebre Selasieri hartu dio aurrea.
- Bukaeran sartu du gola, baina lehenago sar zezakeen Portugalek. Gehiago ere bai. Aise menderatu du Txekia. Baina atezainak golak saihesteko daude, eta Cechek sekulako geldiketak eta urruntzeak egin ditu.
- Portugal hau oso arriskutsua da. Horrela bai. Lehen fasean esaten genuen bazuela gaia horrela jokatzeko. Gaur erakutsi du. Talde sendoari Cristiano Ronaldo bikain hau gehituta, edozein menderatzeko gai da.
