Aurreneko final-laurdena, gaur: Txekia-Portugal
EUROKOPA 2012
Varsovian jokatuko dute (20:45, Tele 5).
- Halakoetan egin ohi den bezala, historiari begirada: 1996ko Eurokopan, Txekiak ezustean finala jokatu zuen hartan, final-laurdenetan elkartu ziren bi selekzioak, eta Txekia garaile, Poborskyren gol bikain honekin.
- Iraganak, ordea, ez du jokatzen Ez da atezaina. Ez da atzelaria. Ez da erdilaria. Ez da aurrelaria. Ez da entrenatzailea. Ez da epailea. Gaur, orain eta hemen. Hori da guztiaren zutabea. Eta gaur-gaurkoz, faborito izaera ezinbestean banatu behar denez, Portugal ez sailkatzea 1996ko ezuste haren parekoa litzateke.
- Datuak, lehen fasekoak:
- Txekiak 4 gol alde, 5 kontra. Portugalek 5 alde, 4 kontra. Ez dago ezberdintasunik goletan.
- Baloiaren jabetza: Txekiak 90 minutuz eduki zuen baloia, Portugalek 74 minutuz. Ondorioa: ekimena gehiagotan hartu behar izan du Txekiak Portugalek baino. Eta Portugalen jabetzaren ia gehiena atzelarien eta euskarrien artekoa izan da, defenditu eta kontraerasoa baitu oinarri bere jokoak.
- 2. datu horri eutsiz, gaur ere Portugalek emango dio ekimena aurkariari. Txekiak erne erasotu beharko du, begi eta erdi defentsan jarrita. Kontraerasoan zitala baita Portugal. Eta erasoko jokaldiak bukatzen baditu, hobe. Erasoa-defentsa trantsizioa ere ondo egin beharko du Txekiak, eta azkar.
- Txekiaren erasoaren indarrak eskuin hegaletik atera behar du. Gebre Selasie eskuineko atzelariak askotan egin izan du gora aurreko partidetan, eta Cristiano Ronaldok ez duenez defentsako lana egiten, hori baliatu beharko dute txekiarrek.
- Cristiano Ronaldok ez defenditzearen beste alderdia: kontraerasoan txikitu egiten ditu aurkariak. Txekiak ondo-ondo zaindu beharko du, baina hala ere, lanak. Indartsua eta azkarra da, ia geldiezina. Aurkariek bera geratzen baino abilezia handiagoa dauka berak bere burua alferrik galtzen. Gaur zer egingo duen, auskalo!
- Txekiak txukun atzeratu zituen lerroak, defentsako lan ona egiteko, Poloniaren aurka. Agian, ekimena hartu ordez, aukera hobea da hau Portugalen indargunea ahultzen duelako: kontraerasoa.
- Kanporaketa da, finala, kale edo bale. Beti dira garrantzitsuak, eta halakoetan gehiago: geldikako jokaldiak.
- Beste izen bat: Tomas Rosicky. Kili-kolo dabil, azken partidan ez zuen jokatu, baina gaur, zelaian behar du. Bera jokoan dela, hobea da Txekia erasoan. Beharko du izarraren lana taldeak.
- Ekimena batena, ekimena bestearena… eta agian, bietako inori ez zaio komeni ekimena hartzea. Baloia luze jotzea da ekimena ez izateko baliabide bat. Eta baloia zelaira erortzean, ea nork hartu. Eta hartu ondoren, zer? Ekimena eta arriskuak? Ala berriz ere gora? Gora eta gora ez dira ibiliko denbora guztian, hori garbi dago. Baloia non galdu, hori garrantzitsua izango da.