Nork esango zien ingelesei…
EUROKOPA 2012
Ingalaterrak irabazi du D multzoko lehia, gaur Ukraina kalera bidali eta gero (1-0).
- Ezkutuan ibiltzea ona izaten da kirolean; hau da, inoren aurreikuspenetan ez sartzea. Ingalaterra horrelaxe zegoen Eurokoparen hasieran, eta hiru partida geroago, D multzoko lehen sailkatua da. Italia izango du kontrario final-laurdenetan.
- Roy Hodgson entrenatzaileak errazetik jo du, taldea hartu eta berehala. Denborarik ez nahierara jartzeko, eta oinarrizko gauza batzuk landu ditu. Praktikotasuna… eta final-laurdenetara.
- Defentsako lan ordenatua egiten du, lerroak asko atzeratu eta gero. Baloia lapurtzen duenean, kontraerasoa dauka. Eta aurkariak aukera hori kentzen badio lerroak atzeratuz, baloia mugitzen du; gehiegi arriskatu gabe, eta erraz. Sinplea da ingelesen jokoa. Zertarako nahastu, denborarik ez dagoenean?
- Bueltatu da Wayne Rooney… eta berak sartu du gol bakarra (48. minutuan). Buruz. Bultza bakarrik egin behar izan dio baloiari, baina han zegoen, bultzatzeko. Golegile sena. Golagatik ez ezik, taldeari mesede egin dio aurrelariaren lanak. Egokia da kontraerasoetan lehen pasea jasotzeko, eta aukera egokia baliatzeko, beste pase baten bidez.
- Ukraina talde bizia da aurrealdean, baina ez zaio nahikoa izan. Kalera joan da. Txispak bota ditu txapelketan, eztandarik ez du egin, ordea. Zerbait falta. Talde onen eta oso onen arteko aldea.
- Polemika beste behin ere baloiak goleko marra gainditu duen, ez duen. Ukrainaren gola izan dela ematen du hamaika aldiz ikusi eta gero telebistan. Bosgarren epaileetako batek ez du ikusi hala izan denik. Golik ez, eta saltsa berriro ere, eztabaida. Teknologia, bitartean, beste kiroletan; futbolean, ez.