Hauek dira gaurko bi partidak:

• Suedia-Frantzia (20:45, Kiev, Cuatro)
• Ingalaterra-Ukraina (20:45, Tele 5)

Suedia-Frantzia

• Multzoko liderra eta multzoko azkena, aurrez aurre. Frantziak nahikoa du puntua sailkatzeko. Ikusi egin beharko da gero zer egiten duen, bere esku baitago zein aurkari izango duen final-laurdenetan: multzoko aurrena bada, Italia, eta bigarren egiten badu, Espainia. Biak kontrario gaiztoak. Irabazten badu, aurrena izango da (Ingalaterrak gauza bera egiten badu, golak begiratu beharko lirateke, baina aurretik da Frantzia); berdintzen badu, beste partidako emaitza ikusi beharko du.
• Nolako Frantzia azalduko den gaur, horra zalantza. Ez du eman uste zen guztiaren berri. Ezkutuan dauzka gordeta baliabide batzuk. Gehiago eman dezake. Ukrainaren aurka ikusitakoaren arabera, hobeto moldatzen da kontraerasoan, aurkariak leku libreak uzten dizkionean. Ekimena berak eraman behar duenean, gehiago kostatzen zaio. Gaur, ikusi egin beharko da zer bide hautatzen duen.
• Ez da erabaki erraza, aurkariak ez duelako ezer jokoan. Suediak irabazteko premia izango balu, erraza zatekeen Frantziarentzat: defentsako lana eta kontraerasoa. Baina suediarrek zer egingo duten ez dago jakiterik.
• Partida arriskutsua da Frantziarentzat. Suedia ez da punta-puntako taldea, baina txarren multzoan ere ez dago. Erakutsi du badituela hainbat baliabide interesgarri. Baina jakina, motibazioren akuilurik gabe, auskalo zer nolako Suedia azalduko den zelaian.

Ingalaterra-Ukraina

• Irabazten duena, aurrera. Galtzen duena, etxera. Eta Ingalaterrak berdintzen badu, aurrera, eta Ukraina etxera. Lehia interesgarria eta irekia.
• Izen bat denen gainetik: Wayne Rooney. Gaur jokatzeko moduan da, bi partidako zigorra bete ondoren. Hasieratik jarriko du Hodgson entrenatzaileak, beste aurrelariek lan ona egin duten arren.
• Ingalaterra erosoen dago kontraerasoan jokatuz. Ukrainak ikasiko al zuen Frantziaren aurkako ikasgaia? Aurrera joaten hasi zenean, txikitu egin zuen Frantziak. Baina irabazi egin behar du aurrera segitzeko, zaleen aurrean ari da, eta akaso, neurketa zirt edo zart horietakoa bilakatuko du, nahita eta beste aukerarik ez duelako: gehien asmatzen duena , txapeldun.