Hemen da
EUROKOPA 2012
Italia bigarren geratu da C multzoan, eta final-laurdenetarako sailkatu. Irlandari irabazi dio (2-0).
- Gaurko jardunaldia hasi aurretik, txapelketatik kanpo zen Italia. Bukatu dira partidak, eta final-laurdenetan da. Hemen da. Berriz ere. Ondo edo gaizki jokatu, baloiari uko egin edo baloiaren lagun, Italia beti Italia.
- Etxeko lanak ondo bete ditu. Irlandari irabazi egin behar zion, eta halaxe egin du (2-0).
- Golak geldikako jokaldietan sartu ditu, eta golegileak bi aurrelariak izan dira: Cassano eta Balotelli. Lehen zatian aurrenekoak; bigarrenean, bigarrengoak. Alerik sartu gabe zeuden lehiaketan, eta gaur sartu dute bana. Behar ditu taldeak beraien golak. Bide horretan segituko duten edo ez, ikusi egin behar.
- Izututa zeuden italiarrak Irlandarekin… betiere kazetarien ustean. Trapattoni beteranoari omen zioten beldur, Irlandako entrenatzaileari. Baina teknikariak ez du jokatzen. Jokalari onak behar izaten ditu entrenatzaile orok, eta Irlandak ez du sailkatze faseko maila bera eman. Azpitik ibili da.
- Berea eman ez duten jokalariak asko izan dira, eta horietako bat Given atezaina. Askoz ere hobea da, erakutsi duenaren aldean. Baina Eurokopan ez da fin moldatu, konfiantza galduta balebil bezala.