Barrutik, ia kanpora
EUROKOPA 2012
Espainia sailkatu da C multzoko lehen postuan, eta Kroaziak agur esan dio txapelketari (0-1).
- Espainiak bete du berea, baina betelanetik asko eginda. Sailkatu da final-laurdenetarako, eta lehen tokian, gainera. Baina lehiaketaren aurretik, bazeuden zalantza hainbat taldearen inguruan, eta ezbaian segitzen dute. Bat hau da: Xaviren sasoi puntua. Ondo-ondo ez dago.
- Beste zuloa, edo gaitza, hobeto esateko: ohitura txarra du barrutik jokatzeko nabarmen, barrutik hasi eta barruan bukatzeko. Eta hegalak? Hobe luke hegaletatik hasi (Irlandaren aurka hori egin zuten Iniestak eta Silvak; gaur ez). Baloia hainbeste edukita, etekin handiagoa atera beharko lioke. Eta atearen aurrean, eraginkortasuna izateko atera bota behar da. Ez du balio ezohiko gauzak egitea aurkariaren atetik gertu.
- Zelai-erdiko jokalarien mugimenduak oso eskasak izan dira; batez ere, lehen zatian. Leku berean, bi jokalari; denak elkarren parean jarrita, horizontalki. Horrela ezinezkoa da aurkariaren lerroak gainditzea. Teknikak bakarrik ez du taldea ona egiten. Taktika ezinbestekoa da. Biak uztartzea funtsezkoa.
- Kroazia etxera doa, baina aurrera segitzen duten selekzio bat edo beste baino lan hobea egin du. Horixe du hiru partidetan dena jokatu beharrak, eta ezin da ukatu, aldea dago multzo batean edo bestean egokitu.
- Lehiakorrak dira kroaziarrak. Jokalari onak ere bai. Teknikoki onak, oro har. Eta gaur, lan taktiko ederra egin dute baloirik gabe. Beste futbola esaten zaion horretan ere ondo aritu dira, faltak eginez eta erritmoa geratuz partidari. Majo sufrituarazi du Espainia… azken minutura arte (Navasek, 87. minutuan sartu du gola).
- Epailearen lanak mesede egin dio Espainiari. Bi penalti argi ez ditu adierazi kroaziarren alde.
- Iker Casillas azaldu da beste behin, geldiketa eta urruntze bikainak eginez. Espainia ez omen da azken Munduko Kopako hura, baina burua lanean jartze aldera, to galdera: orduan ere ez al zen erabakigarria izan Casillas?