Bi multzo bakarrik geratzen dira Eurokopan lehen fasea jokatzen: C eta D, hain zuzen. Gaur, C multzokoen txanda da, eta hauek dira bi partidak:

• Italia-Irlanda (20:45, Poznan, Cuatro)
• Kroazia-Espainia (20:45, Gdansk, Tele 5)

Italia-Irlanda

• Txapelketa ona egin arren, uzta txikiena dauka sailkatzeko aukera duten hiru taldeen artean: 2 puntu. Irabazi egin behar du gaur ezinbestean, eta gero, beste partidako emaitza ikusi. Berdinketarik ez badago espainiarren eta kroaziarren artean, Italiak aurrera segituko du berak berea irabaziz gero. Berdinketa badago, zenbakiak egin behar.
• Teoria eta praktika parez pare berriz ere. Teoriak dio Italiak irabazi egingo diola Irlandari. Hobea delako, eta hobeto moldatu delako txapelketan. Baina praktikak dio nagusitasun hori zelaian erakutsi behar dela, eta hor, ezusterako aukera egoten da batzuetan (galdetu, Errusiari, bestela).
• Italiak baloiaren jabetza izanda, atzean sartuko du Irlanda, eta zenbat eta gorago aritu, hobeto. Gero, baloia galtzean, presioa goian egiteko, irlandarrak ez baitira trebeak halako egoeretan; baloia erraz kentzen zaie. Beste gauza bat da Irlandak noraino iristen utziko dion, atzeko lerroa aurreratuta, esaterako.
• Irlanda geratzeko ez luke lan handirik behar Italiak.
• Gola eta eraginkortasuna: hor du zuloa Italiak. Iritsi, dezentetan iristen da aurkariaren areara, baina bi aurrelarirekin aritu arren (Balotelli eta Cassano), golik gabe dago. Ez harritu gaur Di Natale aritzea hasieratik.

Kroazia-Espainia

• Kroazia ez da Irlanda, baina Espainian oso jende gutxi ari zaio horri erreparatzen. Irlandari astindua eman izanak lehen baino gehiago puztu ditu espainiarrak. Partida ona jokatu zuen, hori ezin da ukatu. Baina aurkaria zein zen ere kontuan eduki behar da. Kroaziak estuago hartu behar luke gaur gauean.
• Bi aurrelarirekin ari da Kroazia. Kontuz ibiltzeko modukoa da espainiarrentzat, gaur ere birekin ateratzen bada. Italiaren kontrakoa gogoan, Espainia erasoan zenean, bi biren aurka geratzen ziren atzealdean: bi aurrelari italiar, bi atzelari espainiar. Balizko arazo horri irtenbidea jarri beharko dio egungo txapeldunak: edo euskarri bat atzerago jarriz, edo hegaletako atzelari bat atzerago ipiniz erdiko atzelariei laguntzeko (baloia ez dagoen aldekoa). Edo bestela, baloia goian galtzen duenean, Italiaren aurka baino hobeto eta gehiago presionatu beharko du.
• Agian, Slaven Bilicek zelai-erdia indartu nahiko du aurrelari bakarra aterata, Espainiaren jokoa hor baita indartsua eta adimentsua. Ez du ematen Italiaren aurka amaitu zuen bezala hasiko denik gaur: Rakitic euskarrian, eskuineko hegal osoa Srnari utzita, eta Modric aurrelarien atzean. Baloiaren jabetza edukitzeko aukera ona da, eta beharrezkoa Espainiaren aurka, baina gero, defentsako lana egiteko ahula. Entrenatzaileak erabakiko du zer egin.
• Espainiaren baitan ere zalantzak: aurrelari finkoa atera ala aurrelari finkorik gabe jokatu?