‘Carpe diem’
Galdu egin du Athleticek Zaragozan (2-0), eta lau puntura urrundu zaio Txapeldunen Ligan aritzeko aukera. Osteguneko poza, gaurko tristura.
- Bizitzan bezala futbolean, edo futbola ere bizitzaren baitakoa denez, momentu onak gozatzen ikasi behar du ez dakienak. Partida batetik bestera poza tristura bihurtzen da, irria negar. Athletic triste ibili da gaur Zaragozan, eta osteguneko poza inoiz ahaztuko ez bada ere, galtzearen gorputzaldi txarrarekin utzi ditu denak. Partida bateko bidea baino ez dago alaitasunetik tristurara. Futbolean ere ‘carpe diem’.
- Gaur partida, asteazkenean bestea, eta hurrengo asteburuan ere bai. Eta asteburu horren bueltan, Europako Ligako finala. Atsedena behar zuten hainbat jokalarik, eta horretan oinarritu du 11koa Marcelo Bielsak. Aulkian izan ditu Llorente, Muniain, Susaeta, Javi Martinez eta Amorebieta titularrak. Zerbaitegatik ari dira beti jokatzen, eta taldeak ez du beste egunetako gauza onik azaldu.
- Baloiaren jabe egin da Athletic. Egiteko gaitasuna duelako, eta Zaragozak hala nahi izan duelako. Etxekoen baliabidea kontraerasoa izan da.
- Baloiaren jabetzaren datuak eman ditu gaur ere telebistak. %60tik gora Athleticek, geratzen den soberakin txikia Zaragozak. Baina Zaragozak bi gol sartu ditu, Athleticek bat bera ere ez. Baloiaren jabetzari helburua(k) jarri behar zai(zki)o… beste atea dago aurrean, atezaina han, atzelariak aurrerago, hegalak margotuta zabalean… Gola behar du helburu baloi jabetzak, sakontasuna. Gaur gutxi izan du halakoetatik Bielsaren taldeak.
- Bielsak ez ditu jokatzeko aukerak oparitzen. Irabazi egin behar izaten dira. Gabilondok irabaziko zuen, eta hasieratik aritu da. Baina irabazitakoa galtzea debekatuta dago Rosariokoaren filosofian. Bigarren zati osoa zelaitik kanpo ikusi du Gabilondok.
- Zaragozaren lehen gola, lehen zatikoa. Autopista bidesaririk gabe zelaiaren erdiko bidetik. Edu Oriolek atzean utzi du Iñigo Perez. Iturraspek beste aurkari batengan zituen begiak eta gorputza jarrita, eta ez dio lagundu Iñigo Perezi. Laguntzarik eza da buruz buruko zaintzaren gabezia handienetakoa.
- Zaragozaren bigarren gola, bigarren zatikoa. Urrutitik. Zartako indartsua Apoñok. Gaur egungo baloiak txoroak izanik, zigi-zaga egin du, eta gainerako guztia Iraizozen hutsa izan da. Urrundik jaurtitako baloi horiek…
- Azken 20 minutuetan, hil egin dira Zaragozako jokalari asko. Lurrean bueltaka, hango mina, hemengo ulua. Erritmoa desagertu egin dute. Jokorik ez, atzetik doanaren kalte.
- Llorentek jokatu du azken minutuetan, baina taldekideek ez dute asko baliatu aukera. Hegaletan ibili bai, baina erdiraketa gutxiegi aukeran.