‘Més que un club’
Bartzelonak Tito Vilanova aukeratzea entrenatzaile izateko ezohiko erabakia da gaur egungo futbolean, eta klub handietan, oraindik eta harrigarriagoa.
- Pep Guardiolak ez zuela jarraituko erabat ofizial egin baino lehen, balizko ordezkoen izenak dantzan jarri dituzte bazterretan. Marcelo Bielsa, Ernesto Valverde, Laurent Blanc, Luis Enrique… Baina azkenean, eta ezustean, Tito Vilanova aukeratu du klubak. Ezohiko erabakia.
- Bartzelona klub handia da, munduko handienetakoa. Baina handien artean, badu berezitasunik: harrobiko jokalari asko ditu lehen taldean. Orain ere, entrenatzailea ere harrobitik atera du.
- Ez da ohikoa bigarren entrenatzaileak lehenengoa ordezkatzea. Are gutxiago klub handietan. Kartera atera eta fitxatzera ohituta daude, eta entrenatzaile onenak jotzen dituzte begiz. Bartzelona salbuespena da.
- Izenari baino izanari erreparatu dio. Ezarrita dagoen ereduari jarraipena ematea erabaki du, eredu hori ezarri duenetako bat ezarriz entrenatzaile. Koherentzia. Futbol taldeetan ezagutu ere egiten ez duten hitza, oro har.
- Entrenatzaileena ziklikoa dela esaten da. Joan eta etorri. Baina ziklikoa ere bada honetan: denbora tartea batean, beti berdinak egoten dira ‘salgai’. Beti izen berdinak talde batetik bestera, eta denboraldi erdiko aldaketetan ere, izen berdinak. Bartzelona ez da sartu denda horretan, eta etxeko almazenetik aukeratu du berria. Aukera eman dio ‘ezezagun’ bati. Ezohikoa hori ere.
- Munduko beste klub handiren batek egingo al luke gauza bera? Ezezkoaren traza dauka erantzunak.
- Bigarren entrenatzaileei eta denda distiratsuetan ez daudenei, segituan jartzen diete titulua: “Ez daude prestatuta”. Nola ez diren salgai jartzen edo inork ez dituen salgai jarri, ‘txarrak’ direla ematen du. Ez dagoena txarra bailitzan, existituko ez balu bezala. Okerra erabatekoa. Makina bat entrenatzaile on daude klubetako almazenetan, hautsa hartzen.
- Kluba baino gehiago dela zabaltzen du Bartzelonak munduan zehar. Entrenatzailea ordezkatzeko erabakian hala dela erakutsi du.