Ereindakoa jaso dute biek
Bayern sailkatu da Txapeldunen Ligako finalerako, Real Madril penaltietan kaleratu eta gero, espainiarren zelaian.
- Lehen zatia eta bigarrena jokatu dutenak talde berak al ziren? Azkar eta oso makal. Dikotomikoa izan da partida. Lehen zatian, bizi-bizi, gora eta behera, neurketa irekia. Emaitza: 2-1. Bigarrenean, ez gora, ez behera. Geldi bezain geldo. Emaitza: 0-0. Zer gertatu da aldageletan atsedenaldian?
- Beldurra nagusi aginduak emateko orduan bi zatien tartean. Real Madrilek izua zion Bayernen kontraerasoari, eta Bayernek beldurra Real Madrilenari. Bestela, ez dago ulertzerik halako aldaketa zati batetik bestera.
- Beldurrari nekea gehitu. Partida aurrera joan ahala, nekatu egin dira jokalariak, eta orduan ezina nagusitu da. Nahi ez, eta ezin, gainera
- Bizitza eta heriotza. Arnasa eta itomena. Horra lehen zatia eta bigarren zatia. Bizitzaz hitz egitera goazen. Bayernek sekulako dantzatua eman dio Real Madrili baloiaren jabetzaren bidez: teknika bikaina, mugimendu onak Real Madrileko lerroen artean… Gauza batean egin du huts: gola sartzean. Gero, penaltietan, lehen zati horretan ereindakoa jaso du.
- Eta Real Madrili buruz zer? Ereindakoa jaso duela honek ere. Lehen zatian, Bayerni ezin baloirik kendu (nola kenduko dio 6-7 jokalarik bakarrik defendatzen badute?), eta bigarren zatian, baloia izan duenean, gaitasunik ez jokoa sortzeko. Dena da futbola, eta entrenatzaile bakoitzak nahi duen bezala antolatzen du bere taldea, baina ez al da milioi mordoa alferrik galtzea Real Madrilen eta Mourinhoren arteko harreman hau?
- Goraipatzekoa alemaniarren tenplea. 2-0 galtzen jarri arren 14. minuturako, ez dira erori, eta landutakoa egiten segitu dute.
- Hiru aldaketa egin ditu Mourinhok: Kaka, Granero eta Higuain. Ez dira edozein, baina ezer gutxi eman diote taldeari, Kakaren jokaldi pare bat izan ezean. Heynckesek aldaketa bakarra baino ez du egin, eta Mullerrek ere ezer gutxi eman dio taldeari.
- Penaltietan, 1-3 Bayern nagusi. Izar handiek ere kale egiten dute; atzo adibide bat, eta gaur bi: Cristianok eta Kakak kale.
- Finalerako, hiru jokalari faltako ditu Bayernek, txartelak tarteko: Alaba, Luiz Gustavo eta Badstuber.