• Bartzelonak irabazten ez duenean, ohitura zabaldu da aurkariari meritua kentzekoa, ona eta txarra Bartzelonak egingo balu bezala. Ezin da ukatu Bartzelona ez dela ari ohiko jokoa egiten, eta gaur ere ez duela egin, baina Chelseak oztopo guztiak gainditu ditu, defentsako lan ikusgarria eginez.
• Gainditu beharreko oztopoak:

1. Cahil erdiko atzelaria lesionatu zaio hasi eta berehala. Aldaketa, eta hainbat jokalari lekuz aldatu behar. Ez ahaztu Cahil zela David Luizen ordezkoa, aspaldian min hartuta baitago.
2. Terryk bere burua bota du kalera, txorakeria handia eginda (Alexisi ostikoa eman dio, baloia beste leku batean zela). Kapitaina izateko, taldekideentzako eredu ona, bai horixe.
3. Hamar jokalarirekin aritu behar izan dute ingelesek ordutik, eta atzealdea erabat eraberritu behar izanda: Ramires atzeko hegalean, Ivanovitx erdiko atzelari Bosingwarekin batera, eta Cole beste hegalean.

• Drogbak atzelari lanak ere egin behar izan ditu. Bai ondo egin ere! Defendatu, erasoan azaldu bakarrik eta munduaren aurka, baloiak gorde, goiko baloi denen bila borroka latza egin… Taldekideentzako eredu ona bera da. Drogbaren tropa izan da gaur Chelsea.
• Bartzelonari dena jarri zaio alde. 2-0, eta jokalari bat gehiagorekin. Baina atsedenaldira heldu aurretik, Ramiresen golak aurrez egindako lan dena txikitu dio.
• Aurrez egindako lana esatea edo emaitza esatea gauza bera izan da gaur. Eta hori Bartzelonaren kasuan salbuespena da; besteetan, emaitza joko onaren ondorio izaten delako. Gaur ez. Gaur, golak ez ditu sartu bere betiko jokoaren eraginez. Lehenengoa, korner baten bigarren jokaldian; bigarrena, kontraerasoan edo erdi-kontraerasoan.
• Bartzelonak ez du betiko jokoa egin. Akats nagusia hau izan du: makal mugitu du baloia. Beste akats batzuk: lehen zatian, dena erditik egin nahi izan du, hegaletan zuloak egon arren. Gero, bigarren zatian, eta jokalari bat gehiagorekin zela, hegaletatik jokatu du, baina 2x1ekoak egin gabe; hau da, beti buruz buru. Alvesek inoiz baino erdiraketa gehiago atera dituela kontatzeak azaltzen du hegaletan baliabide gutxi izan duela gaur etxeko taldeak.
• Bartzelonako jokalariak baloia hartu, taldekideari eman, eta mugitu egiten dira, aurkariari ihes eginez. Baina gaur, bigarren zatian batez ere, aurkaririk ez zuten gertu baloiaren atzetik aritu direnek: Xavik, Iniestak, Messik, Puyolek, Busquetsek. Itzalak gainditu behar zituzten, eta horregatik, bakarrik zirelako, baloia gehitxo eduki dute oinetan, abiadura eman beharrean. Galbidea izan da hori.
• Golak sartzeko aukera gutxi egin ditu gaur Bartzelonak, baina izan dituenak sartzen ez du asmatu. Nabarmenena Messik huts egin duen penaltia bigarren zatiaren hasieran. Kanporaketa osoa hartuta, zama handiegia izan da hainbeste aukera huts egitea. Eraginkortasunik ez. Chelseak, aldiz, hiru izan (esate baterako), eta hirurak barrura. Eraginkortasuna.
• Finalera begira, Drogbaren tropari lau jokalari faltako zaizkio, txartelak medio: Terry, Ivanovitx, Ramires eta Meireles.

http://www.youtube.com/watch?v=MwNo0tUaxbo&feature=related