Irabaziko ote du Jupp Heynckesek Txapeldunen Liga bigarren aldiz? Bi pauso falta zaizkio. Finalerdia, eta hori gainditzen badu, finala.

Futbolaren kontuak tarteko, finalerdiko aurkariarekin irabazi zuen Txapeldunen Liga. Real Madrileko entrenatzailea bera zen 1998ko udaberri hartan. Zazpigarren aldiz irabazi zuen Espainiako klubak Europako lehiaketa preziatua, 32 urteko lehortea bustiz.

Bada, gaur eta apirilaren 25ean gainditu beharko du Real Madril Bayern Munichekin, bere egungo taldearekin. Gaur Alemanian, eta astebete eta egun bat geroago, Espainian.

Golek erabakiko dute bietako zeinek egiten duen aurrera, eta horretan ere oso abila izan zen Heynckes. Entrenatzaile lanetan urte askoan ari da, eta urruti geratu da jokalari zeneko garaia. Baina ez da ahaztu behar. Gogoan edukitzekoa baita. Oso aurrelari ona izan zen. Onenetakoa bere garaian.

Bundesligan, 385 partida jokatu zituen, eta 220 gol sartu. Hirugarren onena da historian; Gerd Muller (365 gol) eta Klaus Fischer (268 gol) dauzka aurretik. Bi taldetan egin zuen jokalari bidea: Borussia Moenchengladbachen hasi , Hannoverren segitu, eta Borussian amaitu.

Europako lehiaketetan ere, golegile onenetakoa izan zen. 64 partida jokatu zituen, eta 51 gol sartu. Batez bestekoa ikusgarria da: 0,80 gol neurketako. Bere aurretik, golegile onenen zerrendan, hiru jokalari baino ez ditu, eta ez dira edozein: Raul (71 gol), Gerd Muller (65) eta Eusebio (57). Atzetik du Di Stefano handia (49 gol).

Selekzioen partidetan, Mendebaldeko Alemanian aritu zen, eta 39 partida jokatu zituen. Golegile sena erakutsi zuen hor ere: 19 gol sartu zituen.

Futbolari lanak amaitu zituenean, nahikoa gol sartu eta gero, golak nola sartu behar diren eta nola ez diren jasotzen irakasteari ekin zion. Entrenatzeari ekin zion, eta zeregin horretan izan duen arrakasta, eta izaten ari dena, ondo gogoan daukagu.

Alkate baino lehen, aguazil ona izatearen abantailak.